Körnlibank 2024
Begrüssung
Guata Obad liabi Fraua, Manna und Sonstiges mit und ohni Kind
und im Sinn vu da Gleichstellig begrüssid mir au alli Lüt, wo nöd do sind.
Wir freuid üs uf an lustiga Obad mit eu liebi Gäscht
hönds gmüetlich und gönd no lang nöd is Näscht.
Neuzeitliche Obervogelwahl
Da GP Peter Graf isch hüt zum neua Obervogel gewählt wora
da isch übrigens dä mit da ziemlich grossa Schnorra.
Er dörf sich ab hüt au zella zu da Räbschter Servelat-Prominenz
und mir Vögel sind froh, hätt d Wahl klappat s erste Mal mittels
Künstlicha Intelligenz.
Müllentsorgung
Dia neua Unterflurcontainer för da Abfall sind da Hit
i hoff, dass es bald no mehr davo i üsam Dorf git.
Vorallem sött s grad neben am Rothus so a Abfallmulda ha
damit ma da Mischt wos dött prodoziered, schnell entsorga ka.
Elterntaxis sind uncool
I da Primarschul vorallem im Schulhus Schacha
gits viel Autoverkehr und da find i nümma zum Lacha
D Eltera tönd mit am Auto fascht i dia neu Pausahalle ini fahra
nu wills bequemer isch und s könnd no a kli Zeit ispara.
Doch mir Obervögel hönd a Lösig und da ganz ohni politischa Vorstoss
mir sitzid nämlich immer am Mäntig als Klimakleber uf d Ergetastross.
Rikon ist eine Reise wert
Da Hampi und Rosi Reifler, beidi im Pensionäre-Zustand
fahred im Auto zum Ikaufa uf Rikon is Zürcher Oberland
Noch am Shoppa wänds übers Thurgau hom karra
doch im Öpfelland tönd sie sich mit am Auto bös verfahra.
Nach stundalanger Irrfahrt findet sich da Hampi trotz nüchteram Zustand.
statt z Räbschta plötzlich wieder z Rikon im Zürcher Oberland.
Sini Frau muess drum mit ihm heftig schnorre
und as isch näbst am Mittagesse au no da Znacht uswärts ignoh wore.
Magenprobleme bei Willi Haltiners Wandergruppe
A paar alti Tschutter sind uf d Bündner-Berg ufi gloffa
dabi hönds i da Pausa einigi Sonnabräu-Bier gsoffa
bis gemerkt hönd, dass s Bier scho vor zwo Johr isch abgloffa,
so trinkfesti Manne, wöred weg däm sicher nöd vom Dünnpfiff betroffe.
Das gross befürchteti Magen-Liede
loht sich sicher mit eme feina Schnäpsli vermiede.
Doch dia Idee isch i d Hosa, es wörd kein Schnaps gsoffa
denn dia ganz Fläscha isch im Rucksack vom Röbi Göschler usgloffa.
Leckeres Kinder-Mittagessen
Da Mittagstisch isch zuerst bi da Evangelischa im Kirchgmeindshuus gsi
doch da isch seit däm Summer Vergangaheit und vorbi.
Da Gmeindrot sait, as wöri neu gässe bi da Katholischa im Pfarrhuus oba
und dia Gschicht isch übrigens gär nöd gloga.
Und i befürchte, dass i da Mittagstisch bald wieder amana neue Ort gseh’
nämlich im GBR oba, bi da Muslime i da Moschee.
Bienen-Club ade
I bi i da Hub oba am Suffa und am Fressa
und das gmüetlich Fest bliebt för mi unvergessa.
Iiglada hät da Ivo Keel, üsara Summ Summ
da Biena-Club wörd ufglöst und alli frögid sich warum?
Ohni dia Lüt luagad keina mehr för d Natur und zur Biodiversität
Hoffentlich gits an neue Verein, dänn för guati Sache isch es nie z spät.
Und zu später Stund’ isch a Mitglied zu da Hub usi krocha
und däm hät doch grad no a Bienli vum Ivo is Hirni ufi stocha.
Verspätete Wahlresultate
I warte uf d Resultat vu da Nationalratswahla und tua schnorra
denn dia sind vu üsera Gmeind erst am Abend veröffentlicht wora.
Währed dära Verspötig han i drum no a Sunnabräu-Bierli i gschänkt
und z St. Galla oba hönd sicher dia erste Gewählte scho wieder über ihren
Rücktritt nachdänkt.
Unfall von Frau AXA
D Katy am AXA-Apollo sini Flamma
hät da Zeha brocha und am Fuss a Schramma.
D Ursach isch einmalig und da isch nöd gloga
a Fläscha Schampus isch ihra vum Kühlschank uf da Fuess abi gfloga.
Und i ha ghört, am Apollo seg das Missgeschick spurlos verbi
und er seg froh, dass es nöd sini Bierfläscha isch gsi.
Rote Köpfe an der Kirchbürgerversammlung
I gseh‘ a da Kirchbürgerversammlig vo da Evangelischa
a hitzigi Stimmig, Emotiona, bösi Vote und viel Blabla.
Dabi gohts au ums Geld för da Marper-Kirchachor
und do hör i, wia da Tüüfel am Gott flüstarad is Ohr
„Man sött d Kircha-Fusion grad wieder künda
Abe zu mir is Fegfüür, heissts för üsi Marper-Fründa“.
Traum und Wahrheit in Einem
I bi a Turneri und sött für an Wettkampf Weitsprung trainiera
I gang im Schacha is Training und tua nöd gross studiera.
I nimm Anlauf und triff da Weitsprung-Balka ganz genau
drum flüg i weit, doch mini Landig isch au, au, au.
Drü Täg spöter wach i wieder uf und glotz a d Spital-Wand,
will da Schacha-Huuswart vergessa hät för d Wietsprungalag da Sand.
Rechnen ist Glücksache
Da Alex Arnold, üsara neu Gmeindspräsident
isch gradlinig, bürgerfründlich und eigentlich intelligent.
Doch a da Bürgerversammlig hönd sini Zahla nöd ganz gstumma
will är uf sinara Folia vertuscht hät a grossi Summa.
Mir Obervögel organisierid ihm und da isch kein Gspass
drum grad an Rechnigskurs z Räbsta‘ i da ersta Klass‘.
Tierisches Badminton-Spielen
I luag am Badmintonclub am Obad bim Training zua
und geseh öppis, wo mi tagelang nöd loht in Rueh.
Zmitst i da Turnhalle Progy liegid nämli zwo Schäfer-Hünd‘
und danebad spielids a Doppel, dia vier Federball-Fründ‘.
Und i ha gehört, falls es da Hünd bim Seicha und Schiessa pressiert
heg da Abwart Jenny grad no an Robidog i da Turnhalla installiert.
Fake oder Nichtfake
Da Peter Hengartner hät Krach mit sinara Frau
und ärgert sich grüe und blau
Er redet wochenlang nünt mit ihre und as wörd no krasser
Er kommuniziert i dära Ziit nu no mit ara Fläscha Mineralwasser.
Aber noch drü Wuche ist dä Spuk verbi
wills stilles Mineralwasser isch gsi.
Gianni’s Dachschaden
Da Gianni Faoro ruumt wieder amol in sim Haus uf
und goht drum in Estrich doruf.
Dabi schloht er sin Grind so heftig am Dachbalke a, er verlüürt fast sin Verstand
blütet am Kopf fürchterlich und brucht sogär an Kopf-Verband.
Doch da Gianni ist hart im Näh, halt so an richtige Italo Ma
und leit zum Wieterrume grad da Velohelm über d Verletzig a.
Kiener gegen Keel
Vor da letzta Gemeinderatswahla frögt mi min Sohn
söll i jetzt an Doktor wähla oder an ausbildeta Altersheim-Clown.
Dänn mit am Bruno Kiener und am Johannes Keel
sind zwo Räbschter mit interessanta Brüef gestanda uf am Stimmbefehl.
I sag: Mir ist lieber an Doktor, wo helft, wenns bim Rat da Verstand hät verschoba
als an wietere Clown, dänn vo däne hätts scho gnueg im Rathaus oba.
Unglückliche Terminplanung
I luag i min Terminkalender, i globs nöd und sauf drum grad an Saft
dia Katholisch Kircha und d Oberstufe-Schule hönds wieder amol gschafft.
Beidi tönd ihri Bürgerversammliga am glicha Abend dori führa
und i denk mir dabi: «Tönd dänn dia nöd plana und studiera?“
Und zu däm Debakel kunnt mir no an Spruch in Sinn und a Idee
«Wer beidi Auga zutuat, dä hät kein Durchblick meh’».
Markus Dietsches doppelte Qualen
Da Zelt-Mäk hät a Verletzig am linka Knie
drum schickt ihn sin Doktor i d Röhra, genannt MRI.
Sis Knie wörd gröngat und nochher wartet er dahom uf da Arztbscheid
Zwei Stund spöter kunnt a Telefon: „Herr Dietsche, as tuat üs leid,
aber sie möd nomol zu üs ko zum MRI
will sie üs zeigat hönd ihras falschi Knie“.
So isch dä arm Mann nomol uf Heerbrugg i d Röhra
und isch sich sicher, dia ganzi Welt tuat sich gega ihn verschwöra.
Und will dia Gschicht so tragisch ist, suff i grad no zwo Gläsli Wii
und sing wia s letzt Johr am Mäk sis Lied „As isch amol an Tubel gsi“.
Visionärer Gemeinderatsbeschluss
I da Zitig lese i, dass z Altstätta schlüsst an beliebta Käs-Lada
da hät Unruhe gäh und för da Besitzer an finanzielle Schada.
Da Käs heg i da Nochburschaft z fest gstunka, isch d Begründig gsi
und mir z Räbschta hönd Verbarma, aber nu a kli!
Und i ha ghört, da Räbschter Gmeindrot heg drum grad beschlossa
dass s Rothus wäg am Gstank vu da neue Abfallcontainer immer
am Mäntig blieb geschlossa.
Lärmige Töfflibuaba
Kennid ihr d Töfflibuaba, wo fahrid wahllos im Dorf umanand?
Sie machid s Männli und fahrid sogär gega d Wand.
Da isch för d Anwohner luut und da Lärm isch penetrant
gegeüber da älterei Lüt nöd ganz tolerant.
Aber nöd nu dia Junga fahrid mit däna 30er-Schnäpperli so cool
nei nei, da sind au da Claude und da Michi, üsi beida Huuswart vu da Primarschul’.
Ex-Metzgermeister mit Billett-Problem
Fahrplan läse und Billett kaufe mit da SBB-App isch da Hit
aber wa am Hampi Reifler z San Galle passiert isch, da goht zwit
Stolz zeigt er sis Handy-Billet am Kondukteur
dä stutzt und sait:„I gseh nüt, quel Maleur?“
Will da Hampi vergessa hät da Handy-Akku uf z fülle
tuat er wäg da Busse vu 100 Stutz fascht dori trülla.
Wieso da Akku leer isch gsi, do ka i nu spekuliera:
Tönd ächt au alti Manna im Zug Sexfilmli konsumiera?
Otto hör bitte auf deine Frau
Im Dezember schneits a ganzi Nacht
und rund ums Hus vom Otto Graf a wissi Pracht
Sini Frau sagt: Otto gang go Schneeschufle wia üsi Nachbura
doch da Otto tuet lieber vor am Fernseh versure.
Am andera Tag ist er uf da eisiga Stäge uf d Schnorre gfloge
und hät sich dabi an Bänderriss zua zoga.
Drum hät glachet sini Frau, d Bernadette Graf
und da Otto folgat ihra jetzt immer ganz brav.
Bauamt ohne Heizung
Sie hönd im Bauamt unna doch tatsächlich d Gasleitig kappt und abbaua
obwohl dia neu Heizig erst im Mai verfügbar ist, dia Oberschlaua.
Drum blost da Roman Gruber da Heizigs-Handwerker kräftig da Marsch
will er und sini Manna im Januar frührid bös an Arsch.
Kei Besprechig, kei Znünipausa, alles isch eingefrora
nu leider öppis nöd, nämlich da Manna vum Bauamt ihri gross Schnorra.
Ivo Summ-Summ kauft ein
Da Ivo Keel geht uf Italia go shoppa
und was jetzt kommt, loht sich nümme toppa.
Er kauft Alkohol für sin Biena-Heilsäft und Schnäps för Privat
doch am Zoll sind er und sini Fründ nöd parat.
Da Zöllner frogt: «Du haben niente zum Verzolla?»
da Ivo bejaht und frisst no locker an Zuckerbolla,
aber da Zöllner traut ihm nöd und öffnet da Kofferraum
und am liebsta wür sich da Ivo verstecka hinter am nöchsta Baum.
Dä Ausflug hät sich för da Ivo wörklich nöd glohnt
dänn von era Buss über 150 Euro wörd er nöd verschont.
Katja von der Garage Köppel
Katja Baumgartner isch guet erzoge,
es wörd nöd gfluechet und nöd gloge.
Sie setzt sich gärn für anderi i,
im Turnverein isch sie mit Härz debi.
Bim Leiterässe hät sie de Alkohol lo stoh,
und de Fahrdienst für anderi übernoh.
Was wohl ehra Vater Kurt sich dänkt,
wo sie am Stüür hockt und de Charre länkt?
„Moatli, da isch e riesegrossi Sünd
d fahrsch da Mietbus vo de Garage Zünd“.
Eisbaden im Dezember
Z Konstanz uf ama Partyschiff tönd jungi Räbschter a da Relling sto’
Glüehwii, Bier und Schnaps alles hönds in Grind ini lo.
Plötzlich stönd zwei nu no i da Unterhosa am Deck, und da bi 10cm Schnee
und gumped vum Schiff direkt in eiskalta Bodensee.
I frog mi, gohts um a Wett oder a spontani Aktion uf däm Partyboot?
Eis isch sicher, sie hönd nümma weitersuffa könna weg am Betretungsverbot.
Und so isch da Sohn vum Otto-Peter Bascheler, da Manuel Graf
nüchtern hom und wie sin Vater, endlich solide und brav.
Heiliges Missgeschick
Wir hönd an heikla Fall vu da Katholische Kircha, liebi Fasnachtfründ’
drum dörfed mör da Name nöd säga us Datenschutzgründ’.
Also da B.K. aus R. will nümme i die katholisch Kircha go beta
drum stellt er bim Kircha-Präsi Sieber a Gsuech zum Austreta.
Sin Kirchaustritt wörd schriftlich bestätigt, d Mitgliedschaft als Katholik ist verbi
obwohl dä Mann scho sis ganz Läba eigentlich evangelisch isch gsi.
Da Sieber tut sich spöter entschuldiga, isch da nöd nett?
drum machid wir grad för ihn no a Vater-Unser-Gebet.
Ohne Visum gibt’s keine Amerika-Reise
Da Zelt Mäk planat a grossi Amerika-Reise, aber dia isch schnell vorbi
dänn sini Vorbereitig isch katastrophal, also nöd ganz guat gsi.
Er isch jo grundsätzlich nur chaotisch aber nöd dumm
aber jedas Kind weiss, uf Amerika bruchts a Visum.
Ohni da ka er nöd flüga über da gross Kanal
drum gits halt Ferie bi üs im schöna Rhintal.
Statt feini T-Bone Steak made in USA
hätt er jeda Tag an Kebap z Räbsta ka.
In der Hub werden Gesundheitskosten gespart
I da Aussichtsbeiz Hub häts johrelang quer duri zoga
i ha mi mängmol verkältet und da isch nüd amol gloga.
Drum hönd da Fredi und Mägi viel Geld i nigelnagelneui Fenster investiert
und i ha ghört, dass das Bauprojekt d SUVA, d Mobiliar und d AXA hegid
subventioniert.
Bissiger Kater
Im Altersheim Geserhus läbt a wilds Tier,
d Geserhus-Katz bewacht pflichtbewusst und artig ihres Revier.
Aber au Bsuecher hönd die Katz scho gspürt,
wenn sie sich als neue Chef vom Geserhus hät ufgführt,
Zugebissa hät das Tigerli an Bsucher in Finger,
blütet häts, aber gottseidank nünnt schlimmer.
Und sither spekulierid d Bewohner im Geserhus drin
„Wer ist wohl bissiger: d Geserhuskatz oder dia neu Heimleiterin?“
Unschöne Sprayereien
Min Sohn kunnt vu da Schul‘ hei, isch verruckt und sait
im Kinderspielplatz Schachen hönds alli Spielgeräte versprayt
drum tua i fest uf da Xävi Keel, Alt-Sonnenbräu und Mesmer zella
der tuat bestimmt üsna Kind sini übergross Garteschaukle zur Verfügig stella.
D Schul kennt die Übeltäter und as git a Strof für dia Deppa
kei Angst, sie mönd nöd Schultisch umaschleppa
sie mönd nach da Fasnacht da Progyplatz putza und ganz konzentriert
alli Puncherli einzel ufnäh und zwor noch Farba sortiert.
Erlebnis mit dem Wohnmobil
Bim Benzin ist er beruflich da Spezialist
doch i da Ferie ist ihm passiert an grossa Mist.
Am Christian Thür, Mann vum Männerchor
isch schnell verganga sin gsunda Humor.
Er isch mit am Wohnmobil stoh blieba uf da Autobahn
will er kei Benzin mehr hät und da isch da Wahn.
Zum Glück findet er an Chauffeur us Frankreich
dä hät a Idee und hilft ihm us dem Seich.
Vum Lastwaga hönds Benzin us am Tank agsoga
da Christian hät sogär Benzin im Muul und da isch nöd gloga.
Dänn schnell s Benzin in a Wasserfläscha und in Tank ini schütte.
Die Aktion hinterloht im Portemonnaie vom Christian aber a grossi Lücka,
Doch dia wildi und gföhrlich Gschicht ist no nöd ganz verbii
dänn dä Tubbel hät erst nochher gseh, dass 50 Meter wiiter a Tankstell isch gsi.
Und wo isch eigentlich während dära Aktion sini Frau Judith?
Dia hät sich versteckt uf am WC im Wohnmobil und isch nervlich gsi am Limit.
Martin Breu an der Fasnacht
Es isch Fasnachtsmaskeball und scho spot,
wo de Turbo öpperd kännelärnt, wo en verstoht.
Er lächlet und diskutiert,
macht schöni Auge und gestikuliert.
Wo sis Gegenüber en nachmacht, wird er fascht wild,
bis er merkt, da isch jo mis Spiegelbild.
Eigenartige Behandlungsmethode
Obwohl d Cindy Hartert isch medizinisch gstudiert
hät sich dia jungi Frau doch tatsächlich a falschi Creme is Gsicht ufi gschmiert.
Fieberblooterä a dä Lippä sött mer schnell behandla und ohni Panne
aber sicher nöd mit dä Fusscreme vo dä Mama.
Gesucht wird Grundbuchamt
I hör im Summer an Mann uf am Dorfplatz fluecha
er well a Hus baua und teg drum s Grundbuchamt sucha.
Am „Grüne Baum“ ständi gross geschrieba „Grundbuchamt“
doch döt inna seg das Büro völlig unbekannt.
Da Mann suacht drum im Rothus nebazua s Grundbuchamt
seklat vu links nach rechts und vu unna noch oba und fluchat „Au verdammt“
und noch zwei Stund‘ isch er endlich im richtige Büro gsi
aber das isch leer, will d Mitarbeiter i da Kafipause sind gsi.
Schlechte Geografiekenntnisse
Da Otto Graf goht ana Fussball-Uswärtsspiel
uf Staad abi gos Eins luega, wär eigentlich sis Ziel.
Wo er uf da Staader-Tschuttiplatz tuat spaziera
häts kein Mensch döt und er tuat sich schö blamiera.
As tuat am Fussballfan Otto drum gar nöd gfalla
will da Match scho fertig gsi isch, aber z St. Galla.
Weihnachtswünsche einmal anders
Da Tennisler und Naturschützer, Hirt Thomas
isch bekannt för sin feina Humor und Spass.
Doch einmol do hät er s scho a kli übertrieba
wo er allna Fründ‘ hät wella Weihnachtswünsch‘ schrieba.
Dänn da Grund isch völlig unbekannt
wieso er allna Fründ nur a leers Couvert hät versandt.
Familie Litscher‘s und ihre Katze
Litscher‘s Katz goht gern amol uf Wanderschaft
bis jetzt hets sis aber nu bis uf Balgach abi gschafft.
Und dass man sie au immer wieder tuat finda,
tönds erä drum en GPS-Tracker um dä Hals umi binda.
Als Spass hät dä Sohn Marco dä GPS-Tracker am Vater Jürg is Auto ini gleit
und promt häts en gschäftlich mit em Auto uf Zürich verschleit.
Sini Frau Doris trifft fascht da Schlag, wos GPS blinket im Züribiet
„Üsi Katz hät sich doch wohl nöd i dia grossi Stadt verirrt?“
Ufglöst hät sich schnell dä Fall und d Erliechterig isch gross
und as isch wieder Ruhe iikehrt a dä Schartastross.
Frieren in der Mehrzweckhalle
I da Progyhalla isch es iskalt gsi a da Musikunterhaltig im Januar
nüd amol an Kaffi-Lutz hät eim ufgewärmt a da Musikbar.
Dia neu Heizig hät verseit und isch nöd gloffa
und mir Obervögel tönd drum schwer hoffa
dass da Schulrot das Problem in Griff überkunnt, sus wärs schad‘
und au merkt, dass d Klimaerwärmig nöd bringt dia fehlende 7 Grad.
Vorbildliche Grossmutter
I gseh im Fernseh a Interview mit da Grossmutter Silvia-Zila Brunner
sie üsserat sich zum Thema Elterntaxi ganz ohni Kummer.
Vorbildlich teg sie ihres Enkelkind immer z Fuess i d Schule usi bringa
und man sött drum alli Eltara und d Kind dazua zwinga.
Doch sie tuat am Fernseh öppis verschwiege und do sind mir froh
d Zila hät nämlich gär kein Billet und ka au nöd fahra mit em Auto.
Vogelattacke im Rebsteiner Riet
Do wird en Jogger im Räbschter Riet vomene Vogel attackiert,
und nach däm Zitigsbericht wird scho wie wild spekuliert,
wele Obervogel isch das gsi,
wär vo üs hät es stichfeschts Alibi?
Hät ächt em Bartgeier Busch d Frisur nöd gfalle,
und hät em Jogger d Frise wele style mit de Kralle?
oder isch es üse Dompfaff Renato gsi,
will dä nöd i sinere Kerchä isch debi?
Hät üses Rotkelchli Hermann däm eini verpasst,
wil em Jogger de Flumser Dialäkt nöd passt?
oder isch üse Bänker Jürg mit em nöd gsi so nätt,
wil dä sis Konto bi de UBS statt Raiffise hät?
De Tschutter-Bruch Apollo het em Jogger eis gäh uf d Haxe
wenn er nöd versicheret wär bi sinere AXA.
Dass üses Blaumeisli Claudia aggressiv cha si, isch mer neu,
au wenn me Schütze-Pfütze trinkt statt Sunnebräu.
Wär bhoptet, es seg de Koni gsi, tuet lüüge,
denn dä Vogel cha überhopt nöd flüüge.
oder d Bergdohle Litscher hät em sicher kais gä ufs Dach,
däm isch es im Riet schlichtwäg z flach.
D Reini isch es bestimmt nöd gsi, gäll,
i erem Alter isch me nümme so schnäll.
oder hät üse Wiss-Chrägler Björn ihn agriffe ganz still,
will de Jogger sini Ente uf em Grill serviert ha will?
Üsi Spiegelmeise Butzi hät mit em FC Basel ganz andri Sorge,
und schliesslich isch de nöd wach so früeh am Morge.
oder hät viellicht üsi Hänn Bena de Jogger am Schopf packt,
und wie wild uf däm Arme umeghackt?
Oder öppe üse Strick vo de Ferien-GmBH,
will de Typ nünt mit de Fasnacht afange cha?
Isch üsem Östricher Erwald de Chrage platzt,
so dass er am Jogger hät am Chöpfli kratzt?
Mer Obervögel wüssed’s bis hüt nöd,
aber vo üs isch doch keine so blöd.
Die witere Spekulatione überlömmer eu,
für üs isch klar, s isch gsi en Kriessner Oberleu!
Und tschüss
Mer sind am End vu üsara Präsentation
und gönd witer a dia nächsti Station.
Mir hoffid, er hönd üsi Vers guat verstanda
dia sind übrigens no ohni Künstliche Intelligenz entstanda.
Und überhaupt: Die Künstliche Intelligenz dänkt, sie könni d Welt regiera
aber hüt hät sie doch tatsächlich vergessa, üs Obervögel a Bierli z serviera.
Räbschter Obervögel 2024
