Körnlibank 2022

Rückblick auf unsere digitale Fasnacht 2021

I ha s letscht Johr üsi Fasnacht wella luaga im Internet

has aber nöd gfunda und bi drum halt früh is Bett.
Vu luter Youtube, Liken und Streamen im Plug-In

isch mir da Compi abgstürzt, i glob i spinn.

I bi halt mit dem neue Zügs nöd aso versiert

und min alta Göppel isch drum grad explodiert.

Und obwohls bi euch do inna grüsig stinkt – er send jo scho ganz bleich

ischt da immer no besser als da letztjöhrig elektronisch Seich.

 

Tschüss geliebta Räbstock

Da Räbstock isch ufgeh wora, mer könd da nöd ganz verstoh’

dia Liegenschaft wörd immer älter und am Zerfall überloo

Nöchst Wucha tönds drum sogär vom Kanton uf Räbschta abi cho

da Rebstock wörd unter Heimatschutz gestellt und d Wirtin Zita grad o.

 

Energiestadt Rebstein ohne Mut

Mer Obervögel übernehmid bald d Energiestadt-Jury,

weil üsi Gmeind hät daför kei grosses Gspüri.

Energie- und Kosta-Spara wär eigentli so banal,

wänn ma i da Nacht au abstella würd üsers Licht-Signal.

Doch einfachi Rezept gönd bi üs nöd guat

wills dänn da Rotsmanna und -fraua wohl sofort ablöscha tuat.

 

Das war nicht sehr geschickt

Da Hampi Graf und sini Hilde,

er da Express und sie die Wilde,

sind trotz Lockdown uf Hohenems go poste,

im Lade hett mers am liebsta verschosse.

D Verkäuferin sait: Verschwindid, er bringid üs nu dä koga Virus

und drum isch mit am billig-Iikaufa sofort Schluss.

Sie hönd Angst überko und sind über d Grenza wia da Blitz

uf Schliichwägli vorbi am offiziella Zoll i d Schwiiz.

Und i ha mir so dänkt: Grafs för 10 Täg bi da Groschli i Quarantäna

also i hett sicher nöd vergossa grossi Träna.

 

Rebsteins neustes Bauwerk

Räbschta läbt und üsas Dorf isch aktiv

zeitgemäss, modern und innovativ

Üsi Bedürfnis wörid ufgnoh und mir sind hocherfreut

nu da Gemeindrot hät a Bauwerk a kli bereut.

Doch mir freuid üs mit allne Räbschter Fraue und Manna

uf üsars neu Freibad; zum minsta afang uf dia füf wiessa Badwanna.

 

Wir haben ein schlechtes Gewissen

D Schwiiz hätt im Frühlig d Burka-Initiative agnoh

und einigi Lüt könnid da bis hüt no nöd verstoh‘

Au mer Obervögel hönd a schlechts Gwüssa und biichtid zu Gott

will d Kücken-Maska goht sicher auch scho unters Verhülligsverbot.

 

Verwechslungen wären fatal

A da letzta Fasnacht hönd mer eu über üsi grossa Bauta informiert

und dass da Otto-Peter Graf all dia Projekt als Planer realisiert.

I hoff, dass er kein Bauprojekt tuat verwechsla und versaua

und s Sterbezimmer vum Geserhus is Schulhus Schacha tuat baua.

 

Gendergerecht

«Liebi Fründ und Fründinna vu da Obervögel und Obervögelinna

mer heissid Sie willkomma, liebi Fasnachts-Narra und Fasnachts-Närrinna»

Nach Duden isch da jetzt dia korrekti Anrede gsi, i komm zum spinna,

und bim Schrieba häts glob no a Sternli oder an Schräg-Strich zwünschat inna.

Also dia neu Gendersproch isch schwer und gär nünt för mi

aber d Begrüssig „Liebi Obervögelnde“ wär sicher au verkehrt gsi.

 

Ex Tschutter mit Heizproblem

D Heizig vom Guido Keel, Blumenstrasse isch defekt

und er bietet an Techniker uf, da isch perfekt.

Da Spezialist ortat schnell s Heiz-Problem

und jetzt wörds för da Guido a chli unbequem:

„Guido, dini Heizig isch nöd kaputt – Gott sei Dank

aber du häsch halt eifach kein Heizöl mehr im Tank“.

 

Frauenpower in der Gehirn-Agentur

D Primarschulrot isch wiblich, da isch Fakt

d Glichstellig isch scho lang nümma intakt.

Und grad drü Fraua sind au no in Schulrat inacho

drum sind au scho dia ersta Lämpa doo.

Da bringt dia Manna nämli bös ins Schwitza

denn ab sofort wörd gseicht nu no im Sitza.

 

Neuer Mittagstisch

I tua kocha för da neu Schüler-Mittagstisch

mis Essa isch kindergerecht, gsund und ganz frisch

Mer hönd scho Anmeldige übercho, doch eini isch zum vergessa

do wett doch tatsächlich da Zelt-Mäk wieder amol warm go essa.

 

Golfwägeli sind zum Golfen da

Dia beida Jungtschutter Nico D. und Kumpel Eisenhut

hönd i da Ferie Durscht, Energie und Mut

Sie fahrid mit ama Golfwägeli umanand, natürlich illegal

am Morga am drü, bsoffa, doch da isch dänna scheissegal

Doch sie sind schnell wieder nüechtern wäg däm Seich

wos s mit am Golfwägeli fahrid in an tüüfa, kalta Teich.

Und dia Moral vu dära wahren Gschicht‘

dia beide Tschutter sind glob nöd ganz dicht.

 

Nur Rebstein hat keinen

Rheineck hät eina und Altstätta au

Balgach häts und sogär Diepoldsau

vieli Gmeinda im Tal hönd eina

doch nu mer Räbschter hönd keina.

„Ischas echt wäg da Corona-Verschwörer gsi“

han i dänkt – gemein wia i halt mängmol bi

I bi drum verruckt und ganz truurig,

will i vermiss üsara Weihnachtsmarkt ganz schuurig.

 

Bienenzüchter Hochburg Rebstein

Da Ivo Keel häts Bienäzüchta z Räbsta erfunda,

mit sine Völker verbringt er mängs Stunde

Doch lut amana Ziitigsbericht und zwor a ganzi Siita,

hätt de Ivo neu Konkurrenz uf da Räbster-Berg-Siita.

An Jungimker namens Gmeiner wörd im Rhintaler porträtiert

und d Ziitig schriibt, er machi sis Hobby sehr ambitioniert.

Da Ivo nimmts zur Kenntnis, ganz entspannt

Isch er doch z Räbschta als Biene-Züchter-König bekannt

Mör Obervögel verewiged ihn drum i üsi Körnlibank,

denn das isch dia einzig Ziitig, wo mer erfahrt vom Dorf an Dank.

 

Velofahrt des Gemeindepräsidenten

An Flick-Flack, a Drüfach-Schruuba und an Salto gebückt

guati Stilnota hät er übercho, da Schlussteil isch aber nöd ganz glückt

Glandat isch er leider nöd uf ara Turn-Matta, uf ara weicha

Nein, er isch mit am Bike gradus ini tätscht in a Eicha.

Und will er fräst wia an Hirni über Stock und Stei

isch kaputt, da Arsch, d Achsla und sis Bei.

„Jo Handörgeli, Andi E., Gmeinds-Chef und Präsident:

Häsch i da Bike-Ferie halt wieder amol kei Gfahra kennt.“

 

Es werde Licht an der Bergstrasse

I fahr i da Nacht uf da Bergstross uf Mohra mit mim BMW,

doch bim Elmathof blendats, i tua fascht nünt me gseh’.

A breiti Stross, 100 Lampa mit fascht 1000 Lux,

i komm nümma drus, bi aber halt scho an schlaua Fuchs

I druck kräftig ufs Gas vu minara PS-Auto-Kista

und fühl mi wia uf ara neua Flugzüglande-Pischta.

 

Schneefräse ausser Gefecht

Uf da Winter do hät mer sich was gönnt,

mit amerä Schneefräse hät sich dä Gmeindschriiber Urs Graber verwöhnt.

Im Summer kauft, guet versorgt – doch bim Ort sött ma halt beachta

dass ma sie bi Schneefall nöd nu vo wittem ka betrachta.

D’Schneefräse isch nämlich im Riet ussa komplett iigschneit gsii,

und do fallt au em Männerchor-Präsi einmol nünnt me ii,

Do gits nu no eis, warte bis dä Schnee isch gschmolza,

D Obervögel empfehlend: Im Summer ka mer sii villicht bruucha zum Holza.

 

Rebsteins neue Sozialhilfeempfänger

I bi mit minara Frau uf am Bäsa

und ha bim Bsuach grad no i da Zitig glesa

dass Räbschta soviel Sozialempfänger heg wia a grossi Stadt

und da haui da Stürfuss ufi und macht mi scho a kli platt

Drum luagid üs Obervögel a, mer sind am End, mer verdurstid schier

au mer söttid Sozialhilfe ha, einfach in Form vu zwo Bier.

 

Bachelor ist Kult

D Fernsehsendig Bachelor isch an Quotahit

Also s best im Fernseh wos momentan git.

Do suacht an Maa us über zwanzg Fraua eini us

Dia Sendig isch komisch, kultig aber au abstrus.

Zur Uswahl stond grad drü Wiber us Widnau

Aber dia sind weder telegen, hübsch no schlau

Und s nöchst Johr isch a Räbsterin i d Sendig, da isch jo klar

I bin grad am usfülla vu da Gmeindrötin Boehrer ihram Anmeldeformular.

 

Neues Rikscha-Velo im Geserhus

Dia Verantwortlicha vum Geserhus hönd a super Idee

sie kaufid a Rikscha-Velo han i da Zitig gseh

Das Velo isch perfekt, as haut einigi doch grad us da Socka

so könnid d Bewohner wieder amol bequem is Dorf abi und in a Beiz ini hocka

Doch liebi Lüt: I da Fasnachtsziit tönd dänn mir euers Velo reserviera

dänn könnid mer üsa Björn endlich unfallfrei hom transportiera.

 

GIREMA-Gutscheine

Da Räbschter Gwerbverein hät a neui Gutschein-Aktion lanciert

öpis kaufe – mit Gutschein zahle – i has grad us probiert.

Doch a eim Ort han i dia koga Gutschein nöd könna ilösa

und da hät mi hässig gmacht, i bi halt mängmol an Bösa.

I bi halt an speziella Ma und tua au a kli spinna,

aber könnt ma nöd s Ochsa-Puff au no als neus GIREMA-Mitglied gewinna?

 

Aluhüte sind modisch

Impfkampagna, Impfoffensive, Impfpflicht

I bi ehrlich und sägs eu drum fadagrad is Gsicht

Vielna Lüt isch weg am implaniterta Chip vom Bill Gates Angst und Bang

aber seit i gimpft bi, han i wäg am 2G, no viel da besser Handyempfang.

 

Sonntagsarbeit im Rathaus

An Sunntig noch de Kirche lauf i dia alte Landstross entlang

und gseh, do wird gschaffed a de Stäge bim Rothus-Igang.

Zerscht dänk i, i gseh nöd rächt, was söll da bloss,

anderersits isch uf em Dorfplatz endlich wieder öppis los.

Jo klar, de Gmoandli hät dia Sunntigsarbet sicher befohle,

damit ihm unter de Wuche, de Beamte-Schlof nöd wird gstohle.

 

Wohnwagen-Verwechslung

Da Zelt-Mäk Dietsche isch da best Verkäufer im Tal

doch wa er im Summer gmacht hät, da ischt fatal.

An Maa kauft a Klinigkeit, do hät ihm da Dietsche no öpis gschänkt

und hätt doch grad no an Wohnwaga a s Auto heri gehängt.

Und will sich da Zelt-Mäck regelmässig so loot ablenka

isch da nöd doof; dä hät eifach Pech bim Denka.

 

Obervogelpartei OVP steht bereit

An neue Gmeindspräsident wörd gwählt im Summer

doch da macht üs Obervögel schon no a kli Kummer.

A Findigskommission wörd gründat, alli Parteipräsidenta schaffid mit,

nu d SVP bockat, da findid mir nöd grad da Hit.

Drum isch üsi Obervogelpartei sofort bereit, bi üs wörd nöd pennt

und mer schlagid am Volk üsa Koni vor als neua Gemeindspräsident.

Und för sin ersta Antrag im Rat bittet er um Ruha

er will , dass s Rothus dia ganz Fasnacht bliebt zua.

 

Aktiver Schulhausabwart

„Wäs söll i bloss mache, da isch nöd zum lache.“

So dänkt noch de Ferie e Lehrerin im Schache

Do hät öppert mis Velo gstohle,

söll en doch grad de Tüüfel hole.

De Dieb isch schnäll gfunde und überstellt,

denn da Dieb häts Velo sälber zu de Polizei ufe gstellt.

De Michi Jenny, de Schuelabwart isch de Glon (Clown),

kassiert drum sicher kain Finderlohn.

 

 

Wo ist mein Sitzbänkli

I lieb mis Sitzbänkli im Hirschela oba

und wan i eu jetzt verzell, isch würkli nöd gloga.

D Gmeindsarbeiter brechid s Bänkli ab insgesamt

agordnet hätts da Roman Gruber vum Bauamt.

Doch ein Tag spöter im Hirschala a da glicha Stell‘

bauids s glich Bänkli wieder uf, aber damol ganz schnell.

Doch mir Vögel hönds gmerkt, mer sind doch nöd dumm

mer lachid üs über dia komisch Aktion ganz krumm.

Do gebührt am Roman Gruber nu no Hohn und Spott

wieso das Theater gsi isch, das weiss nu er und Gott.

 

Parkhaus-Ausfahrt mal anders

I gseh d Olivia Friberg im Migros ganz genau

doch wa macht sie denn do, dia guati Frau?

Sie fahrt im Parkhuus a d Schranka aber hinterschi

und da Beifahrer schoppat dänn s Parkbillet in Kasta i.

D Schranka goht uf und sie fahrt rückwärts wiiter ganz routiniert

i glob: sie macht da so lang bis da Vater ihre a neus Seitafenster spendiert.

 

Zeitungen lügen nie

Dass Räbschta prozentual am meista Abfall produziert

lies ich i da Zitig und ha am Problem a kli umastudiert.

Dia Aussag stimmt und i bin zum Ergebnis ko,

viel Müll isch nämli s letzt Johr us üsam Rothus cho.

 

Grosses Leid im Hause Graber

Am Obed bi Grabers ei Drama und ei Not,

wo de Urs verkündet: „Üsi Katz isch tot.

Uf de Hauptschtross überfahre, es tuet mir weh,

bi mit de Polizei döt gsi und has selber gseh.“

Doch am nögschte Tag isch Katz aber wieder im Hus,

Sie isch nöd vom Tod uferstande und kai Sau chunnt meh drus.

De Gmeindschrieber Urs hät sini eige Katz nöd kännt,

da chunnt de vo, wenn me im Büro so viel pännt.

 

Tropische Temperaturen im Gemeindetempel

Im Rothus oba laufid nöd nu d Telefon heiss

nei au bi da Gmoandler lauft im Summer da Schweiss

bi über 30 Grad kömmids im Büro gross is Schwitza

roti Köpf, a nassas Hemd und as tropfad us allna Ritza.

5 Grad kühler im Büro, könnt i mer aber au guat vorstella

wenn dia Deppa im Summer wüarid d Heizig abstella.

 

Transportschaden zweier Männerchörler

Bim Schaffa a da GIREMA sinds in Fahrt und voll im Schuss,

doch dia kli Arbat bringid zwei Männerchörler doch nöd druss.

Mit Salot und Brot hönds an ganze Rollwagä voll biigä,

hönd gmaint bim stossä müends denn au no id kurva ini ligga,

Jo liebä Urs Herrmann und Co-Pilot Jürg Biefer,

da Salot am Bode wörd nüd no riefer

Zrugg i da Progykuchi fangt nomol allas vo vorna a,

und a halb Stund spöter kunnt da Transport komplett im Fäschtzelt a.

 

Ich will schwerer werden

I und min Neujahrsvorsatz, da ischt a spezielli Gschicht‘

i ha s letzt Johr nämli nöd ab- sondern zunäh wella a Gwicht

doch da misslingt; i ärgeri mi drum grün und blau

kei Essa bi da Ortsgemeinde und keis bi da Raiffeisen-GV.

 

Ehe für Alle gilt auch für Obervögel

Söll no öppert bhopte, z Räbschta seg nünt los,

es seg alles so trist und so farblos.

Da isch nöd wohr, jo sogar verloge,

denn i allne Farbe vom Rägeboge,

häts bim Räbschter Mart en Zebrastreife geh,

das hätt ächt kein Räbschter chöne überseh.

Ob Hänn mit Güggel,

oder Güggel mit Güggel,

oder Hänn mit Hänn,

was söll da dänn.

Mör sind offe für d Ehe für alli, da isch au rächt,

usser mit däne vo Marpa, do wirds üs schlächt.

 

Sie kämpfen für unsere Beizer

I gseh i da Zitiga Bilder vu zwo Demonstationa

und zmitzt inna jeweils grossi Räbschter-Fraktiona.

Sie tönd d Beiza-Schlüssiga vum Bundesrot scharf kritisiera

und stramm durch üsi Gmeind und durch Altstätta marschiera.

A Gruppa vum Bahnhöfli isch amana eigna Protest-Marsch gsi.

und als Anführer vu da Linka, isch au üsa Gmeindrot Michi Weber dabi

Und i gseh bi üsam Schwurbler aber grad kei Motivation und kein Reiz

Wär hät denn dä scho amol gseh inara Räbschter-Beiz?

 

Pele‘s Velohelme sind top

Mängmol isch s‘Läba scho a chli fies

Vor allem bim Hodeschüttler Pele Thurnheer sim Tombola-Priis.

As isch a da Turnerunterhaltig scho a chli gspässig und gspunna

do hät är doch grad sin gspendata Velohelm selber gwunna.

 

Kinderbetreuung polarisiert

Da Herr Pfarrer geg da Herr Gemeindspräsident

so a Mediaschlacht hätt ma z Räbschta bis hüt nöd kennt

Beidi sind grundsätzlich för d Kinderbetreuuig, doch mit anderem Ziel

Da enti sagt, da seg günstig, da anderi as kosti z viel.

Und i ha för beidi Sita d Pünkt ufgschrieba

bis hüt stoht das Spieli unentschieda.

 

FC Rebstein wird feminin

Sie hönd Erfolg, sind gsellig und guat im Saft.

am FC Räbschta sini neu Fraua-Mannschaft.

Sie sind talentiert, läuferisch top und guat am Ball

aber trotzdem ha i letzthin fasch übercho an Schlaganfall,

wo i ghört ha: «Üsas Damenteam isch lustig und geil

aber 11 Fraua mit am gliche Kleid, da isch doch kein Style».

 

Schlau muss man sein

Dahom wörd mis Badzimmer saniert, i ka nümma Bada und Duscha,

min Körpergruch tua i sit Wucha nu no mit Parfüm vertuscha.

Doch i ha kurzfristig a Alternative gfunda zum mi Wäscha,

i hock drum i dia schneewies Dorfbadwanne und sauf grad no a Fläscha

 

Lachen und Applaus tut gut

Isch da schön gsi, d Körnlibank wieder ufsäge vor Publikum

vu luter Freud bstell i glob grad no an Cola-Rum.

Jetzt bruchis nümma, min Psycholog und s Care-Team

dänn an Rückfall wäg da Fasnachts-Abstinenz isch jetzt sehr minim.

Und mer trinkid hüt mit eu drum no a feins Büezer-Bier

Prost uf üsi Fasnacht und uf s usverkauft Schiessipapier.

 

 

Räbschter Obervögel 2022