Körnlibank 2026

Fang des Lebens
Jo me weisses nöd so genau,
is ächt da Fisch oder isches sini Frau.
Uf jeda Fall fahrt da Fritz mit sim Schnäpperliii,
Fascht täglich usi in Alta Rhii.
Doch nei er got döt nöd go bada,
well er sorgt för frischa Fisch i üserem Räbschter Lada.
Jo und wis di Fischer halt so hond mit em Mass,
gend alli bim Plöffa halt scho huerra vill Gas.
Doch wieso chunt denn uf omol da Rhintaler bi em verbi?
Jo well för ei , ei, einzigs mol da Wels wörkli sooooo gross isch gsi!

Hampis Vergesslichkeit
Da Hampi Reifler, ex Metzgermeister
isch mängmol verlassa vu allna Geister.
An an Geburtstag fahrt er mit sim Automobil
gemütlich fiira ohni Alkohol isch sis Ziel.
Noch zwo Stund mit Wasser, Kafi und Tee
Goht er glücklich heim und häts geseh’.
Er lauft drum hom bi dunkler Nacht und jetzt kunnt a grossi Blamage
Dahom merkt er erscht, dass sis Auto nöd ischt i sinara Garage.
Drum Hampi: Dass du mit Alkohol s Auto stoh loscht, züügt vu grosser Intelligenz
aber dass du ohni Alkohol s Auto au stoh loscht, isch scho a kli Demenz.

Sparsamer Zelt-Mäk
Üsa Zelt-Mäk isch wohl pensioniert
doch krampfat er wieter ungeniert.
Aber trotz AHV-Renta und Arbeitslohn
schiint er Finanzproblem z ha und da isch an Hohn.
Er nimmt nämlich an Liter Milch us sim Rucksack – und jetzt wörd‘s krass
er frögat nämlich d Hub-Wirtin, öbs för sin Kafi drum gäb ein Priis-Nochlass.

Ein Mann mit Drohnen-Problem
Bim Sascha Gächter, ehemaliga Tschutter
isch im Summer nümma alles in Butter.
Er kauft sich a Drohne und loht sie flüga im Riet
doch dabi isch ihm a grossas Missgschick passiert.
Er druckt da Startknopf und manövriert mit am Joystick
d Drohne flügt und flügt, er hät sie immer im Blick.
Doch plötzlich krachts und as isch abbrocha da Schalthebel
und sini Drohne isch führigslos und verschwindet för immer im Nebel.
Da Sascha fluchat und fluacht drum wia an Spatz‘
dänn dä billig China-Temu-Kauf ist wohl gsi för d Katz‘
Und zwo Mönat spöter tuat man im Fernseh schnora
z Finnland oba seg a unbemannti Drohne gsichtat wora
I da Nochrichta sägids, d Russa segid am Spioniera
aber dass da am Sascha sini Drohne isch gsi, tu nu i spekuliera.

Schlafen ist Eidgenössisch
Dä Fuessball Expert Guido Keel meint er kunnt bi jederä sportart druss.
Und hät drum dänk ich mue au mol ah e eidgenössisches Schwingfescht, das isch eh muss.
Will er jo nöd allei hät wellä go, hät er da Willi Haltiner mit gnoo.
Alles hät klappt wiä am schnürli,
enä sin Sitzplatz, uf dä grossä Tribünä hänts au gfundä, jo natürli.
Das mue so ahsträngend gsii sii, sus ka ich mer das nöd erkläre
Tut dä Guido scho am Mittag sich vo sinä schönstä Träumli ernähre.
Jawol Gschlofä hät er uf sim Sitz,
dä Willi dänkt sich jetzt aber nöd im Ernst, dass isch doch en Witz.
Aber jo, ich bi debii gsii, ka da Guido sägä,
will zum Schlussgang hät er wieder ufghört Tribünä z’ver-Sägä.

Häckerangriffe
Gege Häckerattacke muesch di schütze,
e starks Passwort cha do nütze.
Au Phishing-Mails tüends dr schicke,
die dörfsch uf kain Fall aaklicke.
Da weiss au de Apollo, da gschid Chind,
Drum grift er sich bi de Abrächnig vom Ibrahim an Grind.
D Kreditkarte wird gsperrt sofort,
susch isch no meh Kohle fort.
Isch de Ibrahim en Terrorist,
en Hacker oder en Islamist?
Nei, de Apollo de Vollpfoschta,
isch bi em es Grillgüggeli go poschta.

Jaguar beim Rathaus
I ha ghört, an Jaguar seg im Dorfplatz oba
Drum bi go luaga und has kum könna globa.
An Jaguar i voller Pracht, majestetisch und mit grosser Eleganz
Gschmeidig und gespännstisch stoht er vor mir, drum halt i a kli Distanz.
Aber kei Angst, as isch kei Tier gsi sondern a Automobil
und da gehört am neue Gmeindsschrieber, an Liechtensteiner mit Stil
Da Gaston Jehle fahrt so an verruckta Karra, an Jaguar MXT
so a Auto hätt‘ man z Räbschta sicher no gar nia gseh.
An Tipp hönd mör no an Gaston: Tua bitte langsam durchs Dorf dori fahra
dänn kascht du wäg da Schlaglöcher i üsara Strossa viel Reparaturkösta spara.

Energiestadt Rebstein
Energii Stadt wird z’Räbstä groos gschriba,
wia mer das aber gnau definiert das isch verschiidä.
Under dä Wuchä lüchtend Stroosälampä numä bis am obig spoot
Do kunt uf em Heimwääg öppe ein id Noot.
Gmeindöffnigsziitä händ au drasstisch gänderet
Villicht hät mer detä bis jetzt diä meischt Energie verplämerlet.
Aber natürli dä Energie-Spar-Hammer zum Schluss
Neu wird au am Sunntig Obig für eh Stund im halbe Dorf s’liecht abgstellt,
aso mer kömmend langsam nümä druss.
Wo söttend diä Energiespar ideeä nu härä go
Das spiilt überhaupt kai Rollä, Hauptsach mer ka Pünktlich Stromrächnigä an Bürger usäloo.

Uf gheimer Mission
„I gang is Riet go spaziere“.
So tuet de Zält Mäck sini Frau informiere.
Doch er goht en andere Wäg,
i find da e chli schräg.
Sini Frau dörf nünt wüsse,
dass seit em sis schlächt Gwüsse.
Isch er uf gheimer Mission?
Oder öppe en Russische Spion?
Z Grabs wird em vom Röbi Göschler ä Täsche übergeh,
do isch es klar gsi, i ha s gseh.
Kai Dokument, kai Gäld, sondern was ma halt,
so brucht für en plante Spitolufenthalt.

Endlos Bürgerversammlung
Jo d’SRF Areno die isch gäg üs Räbschta an Scheiss,
da well bi üs jeda ofach alles nomol vill, vill besser weiss.
Über da Stüürfuess und s’Budget wird diskutiert und gäga anand gechsossa
Dabi hät mer ohni gross fröga, davo scho 80% mit am Schuelbudget beschlossa.
Di Einta drohid mit Wegzug, di Andera sind erscht sit korzem doo.
und i bi doch eigentlich nu wäg em Apero choo.
Jo 3 bis 4 mol hond di gliicha grett, da ka doch wörkli nöd sii!
Do kunt bi da nögschta Versammlig ko Sau me verbii.
Brum liebi Bürgerinnen und ussa, er monds Reda jo nöd loo,
aber schriibets Züg doch bitte uf, denn mönd er o nöd 3mol ufstoo!

Tiefe Spuren beim FCR hinterlassen
Jo da Savo isch letscht Zit ofach a kli verwirrt,
ko Ahnig wa dä Tubel zwüschet ini studiert.
Bim Iwintera lupfts am Platzchef Korber fascht da Deckel,
fahrt dä mit em Bus ofach voll in Platz ini, da huerra Seckel.
Er hät da Rasa nöd gad nu a Bizzeli verletzt, und bösi Zunga bhoptid
er het am liebschta gad no Ciccore id Gräba gsetzt.
Und Vom Pokalturnier hom, häts er mit sim neua E-Bike huerra streng.
Liets ächt am Aff oder a denna choga Gäng?
Da Hom erklärt em Babs den: Du Halbschua du Alta!
Mosch amel bim Knopf scho zerscht da Motor ischalta.

Familienstreit in der Magenbrot-Dynastie
De Max Magebrot Rohner schimpft uf Wolke Siebe,
wo isch denn do de Astand blibe?
I sinnere Sippe wird heftig gstritte.
„Chum mer blöd und i hau der eini i d Fritte!“
Azeig wird erstattet und en Strofbefehl erloh,
so händ mer’s us de Präss vernoh.
Usem Himmel tönd’s vehement: „Jo, wo simmer?“
Üs kümmered’s nöd, hoptsach s Magebrot schmeckt wie immer.

Rente futsch
Da Buzzi üsen immer chrampfenda Schuelsekretär,
häts als Pensionierta im Läba jetzt mümma so schwär.
Me ka jo denka wammer will und es wird jo o ganz vill Gschwätzt,
aber i simm Job heg mer en ez grad dor zwoo Fraua ersetzt.
Apropoo s’Läba schwär, macht em jetzt nur no sini Frau.
Well di macht gad glichzitig Auto und E-Bike zur Sau.
Scho isch die 1.Rente weg und da isch den öpa nöd zum Lacha
Er het halt bim Garage baua söla an Fraua Parkplatz macha

Triumph des Jahres
Wer dänkt hät bim FC Rebstein sind dii gloor Riichä ziitä verbii,
hät am letschtä Pokalturnier schön gstuunät wo isch gsii debii.
Mer kas kaum glaubä aber sii händ de Pokal am schluss ich höchi könnä bejublää.
Siit 40 joor nünt me gwunnä am heimischä fäscht, händ sii dänkt jetzt erst recht.
Diä eintä sägend grandios, diä anderä meinend jojo Tschutter sind nöd mini Amigo’s.
Mer Obervögel wänd dä Sieg nomol kurz erwähnä, wer weiss wenn giits nögst mol bi dä Tschutter wider mol Freudä träänää.

Do fahri ada AMAG verbi
Ui, ui ui! Die letschi fahri doch a da AMAG z’Herbrugg verbi,
do luget vo forn a so en schwarza Audi aber ganz, ganz schöö scheisse dri.
Di ganz Schnorra, Schiiwörfer, Spiegel, Stossstange, so öpis hani scho lang num gsee
I fang innerlich kli a Rechna und es tuet mers ligga wee.
Jo heiliga dia Auto Nummera die kenn i doch und es lot merk ko Rua,
lauf dors Dorf und gsech so a verbüülts Garaschotor, da passt ganz guet do dazua.
Aber Himmel, isch da echt üsem OV32 Mürs passiert,oder sicher da’Miri sinera Frau?
Nei nein! S’Töchterli Leja het d’Autoprüefig ez anschienend au!

Firmenschiessen
Vo dä Feldschützä Marpä stoht Uf em Johresprogramm notiert
dass im Juni stattfindet enä Sis Organisierte Firmenschiessen exakt Datiert
Hoch obä uf em Marper Berg positioniert, Isch diä Schüssahlag mondiert
S’wetter hät leider nöd mitgspillt, blitzt und Donneret häts wiä Wild.
En Blitz hät de Schüssstand troffä, sodass isch eifach nünnt me gloffä.
Diä ahgmoldenä Firmene händs gno mit Gelassenheit
und händ gsss….(offä)…. sich Ziitvertibä in Gmüetlichkeit.
Unteranderem isch dabii gsii üserei AXA Rebstein Hauptagentur,
mit em Marper Gabriel Diethlem geballte Kompetenz Pur
es Glas isch sicher au bi em zviil gsii und er wär gschiider Hom gloffä
denn wär er nöd mit em sim Velo in eh stehends Auto ihgschossä.
Zum glück hät sichs Autokennzeichä ah sinerä Stirn feschtdruckt
Am nögstä Tag bim Schaffä hät System dä Fahrzüghalter usgspuckt.
Puuri erliechterig isch iihtroffää wo er hät festgstellt,
es isch en Kund vo de AXA wo em s’Auto zmischt ich dä Nacht hät in Wäg gstellt.

Windräder im Rebstein?
Überall wänd dia Oberschlaua
neui Windräder baua
Z Heerbrugg, im Töni oder z Rüthi oba
überall tönds sie es ablehna oder wörid zeitlich verschoba.
Aber wieso plant man nöd bi üs z Räbschta so a Teil
dänn hettid mir au wieder mehr Geld, oh wia geil.
Und dä Turm mit am grossa Windstoss
wür endlich wieder amol s Rathaus dori lüfta, da wär doch famos.

Initiative Schulorganisation
Jo die Umstrukturierig & die ganza Emoziona, uiuiuiuiu mer sind irritert
Und hend üs Vögel im Umfeld, drum ab Biz informiert.
Gad’s Thema Hoptstrossüberquärig isch den aso scho nöd z’unterschätza
Und da chammer willsgott nöd ofach schöö schwätza.
Scho i die 1 Klass öber d’Stross isch zum Bispil üsa schnüsig Buzziiii,
er isch sit do traumatisiert und blibt ez so chlii.
Da Otto-Peter Graf hä mer zum Glück verschont
und da hät sich för üs Bürger natülich glohnt.
Er hät nöd sini halb Jugend am Zebrastreifen mösa warta,
und hät drum als Intelektuella Gmeindrot chöna dori starta.
Da Jürg Hengartner jo wär en nöd kennt, dä isch glob üsa Ortsgmeindpräsident.
Bi em gots mit em Schadda, well er hät erscht überi mösa ab da Mittelschtuffa,
aber villicht brucht’s för da Amt o ofach nöd da Huufa.
Da Appolo Gruber dä hät da Berg nia verloo
und er läsid all Johri i da Körnelibank wi gschiid er usa isch koo.
Also mer globid: Di Disskussion um da Schulewäg könd mer üs erspaarä,
den hüt werdig di Gofa jo sowieso alli Gfahä.
Jo liebe Eltera trauid eua Kind a kli Schuelwäg zua
und gseends positiv, denn er hend da homm no länger kli Rua!