Körnlibank 2023
Teurer Irrtum
Am Hampi Reifler sini Lag‘ dia isch akut
will sinara Frau ihri Ohrringe sind kaputt.
Z St. Galla oba wänd sie sie zum Flicka geh‘
doch as isch a Trauerspiel gsi, ha i gseh‘.
Bim Stadt-Bummel hätt da Hampi nämli an Strassa-Musikant so fasziniert,
dass er ihm am Schluss grad alles Münz us am Portmonaie hätt spendiert.
Doch spöter im Ohrring-Lada isch am Hampi sini Frau nümma ganz charmant
denn nebst am Münz sind jetzt au d Ohrring bim Strassa-Musikant.
Umtauschaktion missglückt
I gseh d Irene Zelt-Dietsche z Wil imana Lada
und ha för mi so denkt: „Hät dia an Schada?“
Sie möchte för ihri Blusa a Umtausch-Aktion
doch d Verkäuferin antwortet imana strenga Ton:
„Da goht nöd, i ha s Verkaufsdatum prüft und da ganz genau
da Blusa-Kauf isch nämli scho vor 2 Johr gsi, liebi Frau“.
Alte Turnergarde
Da alti Turner, da Jürg Graf
isch pflichtbewusst und brav.
Er kauft im Internet a Billet im Vorus
dä Ma kunnt halt scho no a kli druss.
Er wett nämli s Country Festival jo nöd verpassa
und stoht im Ribelhof z Lüchiga a da Kassa.
Doch as Lächla kunnt vu da Billet-Frau
„Sie hönd aber a Billet fürs Hip-Hop-Open-Air z Lustenau».
Ein grosser Tag im Hause Sonnenbräu-Graf
Alli Sunnebräuler stönd Spalier
will üsi Claudia Keel hüret era Kavalier.
Doch bevors so wit isch, hät de Brüttigam Christoph z warte,
Claudia muess zerscht dur Papas Garte.
Aber wie chunnt sie jetzt durchs hohi Gräs
i ehrem wundschöne wissa Hochzigshäs?
Um grüeni Fläcke uf em wisse Kleid z vermiede,
tuet d Muetter Christine s Gräs drum grad mit em Kuchimesser schniede.
Wahrzeichen sind hipster
Wahrzeicha hätts i da Städt und Dörfer uf da ganza Welt
Z Paris da Eifelturm und z Rom wörft ma inan Brunna Geld.
Z Kairo gsieht ma d Pyramida und z St. Galla dia schö Kathedrala
Und z Altstätta oba tuat da Chumrat immer strahla.
Und als Wahrzeicha gilt au da Schief Turm vu Pisa
und mer Räbschter hönd da «Winke-Winke» bi da Pizzeria Mona Lisa.
Ein E-Bike und ein Turner
Bim Männerriegeusflug uf em Heimwäg,
isch er ufam Velo nümme so zwäg.
Em Jürg Litscher rünnt de Schwaiss,
nöd wil’s öppe isch so mega heiss.
Vom Alter her chönnt me s jo verstoh,
sini Kondition loht halt langsam noh.
Doch ufemene E-Bike tuet er sitze,
und chunnt trotzdem ghörig is schwitze.
Drum los uf min Rat und bi mer nöd bös.
Vor em Fahre, ganz eifach d Bremse lös.
Niederlage für die Obervogelpartei OVP
Mir Obervögel hönd üs fürs Amt als Gemeindepräsident schriftlich beworba
doch d Findigskommission hät üs nöd wella, und mer machid üs grossi Sorga.
Kei Chance hönds üs geh, da Gmeindtempel personell z besetza
ohni, dass mir natürli da neu Gemeindspräsi wänd verletza.
Mir Vögel hönd eigentli an guata und bekannta Kandidat portiert,
üsas Maskottchen, da Detlef hätt nämli offiziell för s Präsi-Amt kandidiert.
Fussball und Velofahren
Vum U-19-Fussballfest z Altstätta oba naba
häts an Räbschter Tschutter mit am Velo überschlaga.
Hät wohl uf da Stross Eis und Nebel ka zmitzt im Summer
drum isch er jetzt halt a Tschutter-Lachnummer.
Leider gilt fürs Velofahra da Videobewies nöd
för da Stefan Städler ist da guat, för üs aber blöd.
Erschwerte Papierentsorgung
De Mäk Heeb nimmt’s sorgfältig i d Hand,
lait Zitige, Papier und Heftli ufenand,
schnürt alles zäme so guet er cha,
aber er isch z spot dra de gueti Maa.
Also hät er s Altpapier zum Sammelplatz brocht,
aber er isch nöd die hällschti Kerza, de Docht.
Alles isch em usenander gfloge,
und was jetzt am Bode lit, isch nöd zum globe.
Rächnige, Brief und Katalög han i gseh,
au Sexheftli sind dabi gsi und no viel meh.
Aber öb’s würklich genau so isch gsi,
überlömmer eurere Phantasie.
Baustellen rund ums Lichtsignal
Langi Warteziita a da Hauptstrasse, ich glob i tua spinna
und plötzli wörds bi da Rössli-Ampla lut im Auto inna
«Bitte sofort wenden» schreit mir mis Navi in d’Ohra
sogär d Elektronik hät glob d’Nerva scho verlora.
«Die nächste Strasse rechts» isch aber au verkehrt
will dia Tübel d Stross zu da Truba ufi au hönd gsperrt.
Autos gehören auf einen Auto-Parkplatz
Uf da Gmeind z Räbschta wird wild diskutiert
Velofahrer gega E-Bikefahrer wird debattiert.
Hitzig und laut wird geredet mit viel Temparament.
fascht gits a Schlägerei wie im Britischa Parlament.
Doch bim ana Bierli spöter versöhnt ma sich ohni Knall
Me het nemli en Konsens gfunda in dem Fall.
Wa z Räbschta uf da Gmeind aber alli stört
isch am Graber sis Elektroauto, wo nöd in Velokeller ini ghört.
Herzlich Willkommen
D Talentschmiede für Gemeindepräsidenta scheint im Eichberg z si
noch am Eggenberger kunnt drum au da Alex Arnold bi üs vorbi.
Er regiert sit Anfang Johr z Räbschta im Rothus-Tempel oba
as isch a klari Wahl gsi, d Weltkugla hätts drum nöd verschoba.
Alex: Wenn dir beruflich oder privat amol sött öpis verrecka
nimms gelassa und tua di bitte nöd grad verstecka.
will mer Obervögel hönd d Ohra überall, as isch scho krass
wega dim Missgschick hönd dänn wenigstens d Lüt ihren Fasnachts-Spass.
Eine Frau in Not
D Gaby Hartert organisiert för Fründinna an Usflug uf d Insel Mainau
d Billette druckt sie us– dia Frau ischt halt schon no schlau.
Doch am nöchsta Tag bim Eingang goht da gross Frust los
sie suacht und suacht: Wo sind denn all dia kaufta Billette bloss?
D Kolleginna hönd s lustig gfunda und sich dabi köstlich amüsiert,
dänn d Gaby hätt s tatsächlich dahom vergessa und isch drum ganz frustiert.
Und bösi Zunga behauptid, sie heg am nächsta Tag grossas Bauchweh
will d Billet scheinbar im Kühlschrank segid gsi zwüschat Milch und Eistee.
Tatü Tata – Die Feuerwehr ist da
Z Räbschta brennts lichterlo
d Fürwehr ruckt us, me lot alles stoh.
Schnell wia da Wind und voll motiviert
wird’s Löschfahrzüg möglichst nöch bim Füür parkiert.
S Löscha isch hart und zerrt a da Kraft,
doch noch langa Stunda isch as endli gschafft.
Flamma sind glöscht und alli könd go
doch s Fürwehrauto blibt eifach stoh.
D Freud’ übers Erreichti ka da nöd verderbe
obwohl s Fürwehrauto muss abgschleppt werde.
Das offene Ohr
I suach da Fascht-Gemeindspräsident und a feins Sonnabräu-Bier
doch im Sterna hönd mir zwei Fraua gsait: „René ist nicht hier“
Er seg nümma Beizer und sie hegid da Sterna überno in Pacht
und drum s halb Dorf über dä schnell Beizerwechsel lut usi lacht.
Und i ha ghofft, dass ma mit am René endli wieder politisiera ka inara Beiz
und da wär för üsas Dorfleba guat gsi und hetti scho a kli an Reiz.
Aber vo da Kommunalpolitik verstönd dia beide Beizer-Fraua us Vietnam
fascht glich wenig wia da Möchte-Gern-Präsi René Ammann.
Wo ist der Weihnachtsmarkt?
Z Lindau am Bahnhof stönd drü älteri Fraua
dia Drü gehörid glob nöd grad zu da Schlaua.
Sie suchid da Weihnachtsmarkt und fühlen sich stark und fit
d Astrid vum Marquart, d Uschi Lüschi und am Mänf sini Brigit.
Doch irgendwänn merkids, dass a däm Tag gär kein Markt isch gsi,
Hom brocht hönds nünnt, aber gsoffa hönds trotzdem mängs Liter Glühwii.
Eine Stadt Rheintal wird geplant
Us da Rheintaler-Zitig liest min ältaschta Sohn
üsi Gemeindepräsidenta hegid a grossi Vision.
Sie wänd ein Stadt Rhintal macha mit da Gmeinda vu Rüthi bis Thal,
dä Zämmeschluss hät viel Potential, bringt tüferi Stüra und isch drum genial.
Aber min Sohn sait: Bi da Planig sött ma denn aber schon no ei Sach regla
Dia Marper-Grindli muss ma dänn vorher scho no us am Verbund usa kegla;
ma sötts am liebsta grad is Vorarlberg usa komplimentiera
denn könnids döt ussa über d Fusionsgründ’ nocha studiera.
Magenbrot Geheimrezept
I tua im Summer zum Magabrot-Rohner is Riet usi laufa
do gseh i grad wia d Gemeind tuat s Gebäude vom Magabrot-Rohner kaufa.
Fascht a Million netto steckt da Marcel Rohner i sin Sack,
dia hoch Summa hätt scho no a kli an Beigeschmack.
Guat, da Boda und s Gebäude für 100‘000 ist eigentli a günstigi Aktion
da Rest ist sicherlich fürs Geheimrezept vu da Magabrot-Produktion.
Und i seh scho da neu Gemeindspräsi i da Backstuba am Teig-Kneta
und da Graber tuat nebenzua wäg da Hygiene an Rosakranz betta.
Bäcker und Fasnächtler sind Frühaufsteher
Wein, Bier, Schnäps suffa i gmütlicher Rund’
offeriert da Beck Lombardi bis i alli Morgastund’
Und damit er nöd nu Männerchörler, Turner und Obervögel kännt
schänkt ihm da Gmeindrot morn grad no s Wirtepatent.
Reto der Feuerspucker
Da Sohn vum Ivo und Aurelia, da Reto Keel
isch bi da Turner seit Johra a guati Seel‘
Er macht am Schauturna mit als Füürspeier
dabi hät er sich verbrennt, zum Glück nöd sini Eier
D Turner-Kollega tönd sich köstlich amüsiera
am Reto sin Bart brennt und er ka sich füf Täg nümma rasiera.
Wau-wau im Rathaus
Kaum isch da Stüür-Sieber mit sim Köter pensioniert
wörd an andera Hund im Rothus oba installiert.
A riesigs Vieh hät mi begrüsst, wo i uf am Grundbuchamt bi gsi
grossi Schnorra und gförchig wia d Heidi Benz luegad er dri
Und i glob bald, mer söttid nöd nu a Tagesbetreuig för üsi Goofa forciera
sondern grad au noch a Hundepension för d Gmeindler realisiera.
Bargeldlose Bank
I ha wella Geld hola uf üsara Raiffeisenbank
ha aber keis übercho und da macht mi ganz krank.
Sie hönd gseit, ihri Schalter segid ab sofort bargeldlos
as isch zum verzweifla, i welara Ziit lebid mir bloss?
Drum sött üsi Bank no schnell d Credit-Suisse kaufa, da täti passa
dänn au dia hönd kei Geld mehr i da Kassa.
Kinder möchten draussen spielen
As kömmid vieli Kinder in neua Mittagstisch go essa
doch eis hönd dia Schulverantwortlicha schon no vergessa.
An Aussenspielplatz wär för d Kind schon no wichtig
wäg da Attraktivität und dass nöd no wörid übergwichtig.
Also i freu mi jetzt scho uf da gross Ansturm
bim Bungee-Jumping obanaba vum evangelischa Kirch-Turm.
Gemeindepräsidenten müssen Musik im Blut haben
I lese es i da Zitig vum René Ammann und lach mi krumm
da neu Sterna-Beizer hät im Herbst kandidiert fürs Gemeindspräsidium.
Musik-Talent isch för das Amt eigentli Pflicht, da gilt au för an Chef vum Sterna
drum hät er vor da Wahla grad no wella Föten-Spiela lerna.
Hampi Reifler, der Winzermeister
Dä Hampi Reifler ehemals Metzgermeister,
meint, as hegi Dieb im Quartier oder spuckend doch Geister?
Schöni Truubästöck vor em Huus hät er züchtet kaa,
da isch eh a guets Joor gsii mit zimli viilna Truubenä draa,
Wo dä Tag isch ko zum Erntä und Abläsä, för da Hampi an Tag zum vergässä.
kei Trüübli häts me dra ka, d Vögel händ em alles über d Nacht weggfrässä.
FC Präsi auf heikler Mission
Luter FC Präsidente tüend e Sitzig mache,
diskutiered im Braustübli vu da Sonnebräu über tusig Sache.
Am nögschte Morge laufed d Telefondröht heiss,
d Sunnebräu lieferet kei Bier, wa söll de Scheiss.
D Laschtwäge könd am Morge nümme lade,
will de Dani Knöpfel isch gsi a kli verlade,
und loht im Suff eifach s Auto vor de Rampe stoh
und hät de Haiwäg z Fuess in Angriff gnoh.
Tipps an die Findungskommission
D Sybille Graf hät an Zitigs-Leserbrief verfasst
för d Gemeindamma-Wahl heg ma öppis verpasst.
Sie hett sich gwünscht i d Findigskommission no a starki Frau
und an Ausländervertretig fehli halt au.
Doch i geseh, die Gattiga sind beidi jo scho vertreta
da Damian Herrsche isch wia d Fraua, hilfsbereit und ganz an netta
und da Adrian Knechtle als Mittepolitiker isch nominiert
är als Innerrödler d Ausländer sicher au guat hät präsentiert.
Und i trink drum gmüetlich mis Bierli und tua sicher nöd schnorra
bi aber schon no froh, isch d Sybille Graf nöd Präsidentin wora.
Otto Graf im digitalen Fieber
Da Otto Graf, Obervogel Nummera eis
stoht im Stoss oba ganz allei auf am Abstellgleis.
Er hät a schlechts Gewissa und da Verfolgungswahn
denn är isch Schwarzgfahra mit da Gaiserbahn.
Und da Grund isch ganz simpel und ganga aso:
«A halb Stund umadruckt am Billetautomat, doch nünnt isch usa cho.»
Und drum frög i da Otto no ganz schnell:
«I welara Pflegestufa bisch du eigentli aktuell?»
Obervogel Nummer 22 mit Terminproblemen
Da Bartli Dani Morscher isch eigentlich ganz zuverlässig
er wartet bi da Sunnebräu und findet da ganz gspässig.
Denn för d Brotsegnig vu da Obervögel kunnt einfach niemand vorbi
will dia Veranstaltig a Wucha spöter isch gsi.
Gemeindepräsidenten-Abschied
Am Handörgeli, exGmeindspräsident und Andi E. gebührt an Dank
d Obervögel hoffid, er findi bi da Pensionierig au no da Rank.
Er isch während vielna Johr a dankbars Fasnachtsopfer gsi
aber Achtung: Mit am Rücktritt isch sini Fasnachts-Karriera no nöd vorbi.
A bitzli Angst han i schon, dass dir langwillig wörd ohni Politik
kasch doch nöd da ganz Tag Kaffi suffa, da Rhintaler lesa und da Blick.
Aber kei künftig nümma uf d Schnorra mit dim Bike, fahr mit Verstand statt Muat
und i hoff, dass er morn grad no alli wissa Badwanna nomol aastricha tuat.
Im Rothus häscht du mängs Projekt aaganga för Kultur, Gesellschaft und Sport
und am Schluss häscht sogär för üsi Kind no planat an Kinderhort.
Da Gmeindskassier isch übrigens scho lang am studiera
wüviel Geld er för Windla, Wickeltisch und Muttermilch söll budgetiera.
Mer hoffid, dass es dir guat goht i dinara Pension
und denk dra, da Schülerhort suacht au no an Clown.
Und i ha letzt Woche au no ghört a bitter bösas Gerücht‘
dass er – zum Schülerhort fülla – grad no an Mutterschaftsurlaub bezücht.
Dass er nöd mit Geld umgoh ka, isch sicher geloga
aber Andi pass uf: Man gibt dir kein Stutz im Sozialamt oba.
Und dass da Andi geistig fit bliebt und no a chli muas studiera
tuat ihn d Primarschuel grad no als Hilfslehrer engagiera.
Als Tixi-Taxi-Fahrer geseh i da Andi eigentli nöd
a Auto ohni BMW-Zeicha isch ihm doch eifach z blöd.
Und bi da Unihockeyaner und bim FC Räbschta im Riet ussa
ischt er neu am Mäuse-Fanga a da frischa Luft verussa.
Und i gseh da Andi au im Riet ussa bildlich vor mir
er hilft am Chiccoree-Puur und sufft mit ihm grad no as Bier.
Und bei Langweile im Winter ischt ei Arbeit för ihn doch klar
er hilft am Roman Gruber bim Schnee-Räumen vu da Trottoir.
Und neu isch da Andi grad no Chef vu da Rhema
und da bringt d Altstätter sicherlich is Dilemma.
Dänn bricht da 9450-er weg da gross Umsatz
wänn d Rhema neu z Räbschta stattfindet uf am Progyplatz.
I hoff, du biiebst z Räbschta wohna und zahlst brav dini Stüüra
nu so könnid mer di amol zum Obervogel uf Mandatsbasis küra.
Aber eis mach bitte witter bis is hochi Alter
tua Festa und Handörgeli-Spiela bi da Nachtfalter.
Mit dära Lobrede isch am Andi sini Räbschter-Politik-Karriera verbi
drum suffid mir Vögel uf em sini Rechnig no an guata fürstlicha Wii.
Apollo und der Fasnachtsbeginn
Da Apollo Obervogel 26 lädt am 11.11 pünktlich uf dia Nünii zum Apéro ein,
vieli Gäscht sind do, doch d Türe öffnet kein Schwein.
Verhocket i da Hub mit ema Kolleg isch dä gueti Maa
und noch Klopfää und Polterä stoht er endli i dä Unterhosä daa.
Und sini Gäst mönd au no statt Biertrinkä und Singä
zerst no dringend am Apollo sis Auto zum Köppel uf Marpa ufi bringä.
Turbos strenge Auslandreisen
Ende letzt Johr hät er sini Wohnig nümma bewohnt
da Turbo Breu hät Kühlschrank, Sofa und Bett eifach gschont.
Zuerst isch er a da Fussball-Weltmeisterschaft gsi z Katar
sogär im Fernseh han i ihn geseh, üsers Schwiizer-Exemplar.
Dänn isch er uf London gfloga för drü Konzert vu da Status-Quo
kumm zrugg sinds no uf Dütschland, au do machid ihn Quo nomol froh.
Und wo i nach däna viela strenga Reisa i sini Wohnig lueg ina
seh i doch grad sini Lebera am Tröchna i da Wöschmaschina.
Kalte Nacht für Werner Ritter
D Frau vum Werner Ritter hät ihn mit am Auto abgholt wegam Alkohol
und am Morga am Füfi ischas am Werner drum nümma ganz Wohl.
Dahom i da Garage isch er im Tüüfschlof, man bringt ihn nümma wach
da Werner schlaft uf am Beifahrersitz und liegt flach.
Er pfussad drum halt i da kalta Garage bis am nöchste Mittig
und er merkt nüd amol, dass da Pöschtler scho brocht hät sini Zitig.
Katholische Suche
Niemert waiss won er blibe isch
Nöd i de katholischa Kircha, nöd unter Mesmers Tisch,
Sogär im Burgkeller suecht de Verwaltigsrot umsusch,
au er weiss es nöd, üse Prediger de Busch,
im ganze Dorf wird umegfröget wo er steckt,
es isch en Fluech, jo ganz verreckt!
Tagelang isch er blibe verschwunde
bis sie en uf em Friedhof händ gfunde!
Ändlich isch de Auto-Ahänger wieder do,
hät ächt s Wägeli vum Samiklaus au e sottigs Ändi gno?
Bachelor und Fussball
I gseh i da Fernsehsendig „Der Bachelor“ a hübschi Frau
und denk mir, dia han i scho tschutta gseh uf üsera Birkenau.
Und tatsächlich tschuttat d Noemi Ortega bi üsam FC
und schienbar ka sie nebat am Fussballspiela au no meh‘.
Sie isch i da zweita Sendig scho usakeit und hät sich a chli blamiert
obwohl sie sich selbstbewusst, sportlich und sexy hät präsentiert.
Noch dära Sendig ischas im FC duss zu und her ganga wia im Liebesbazar
und alli ledige Kerlis hönd bi ihra gscharat, isch jo eigentlich klar.
Und seit dära Sendig isch glob d Damamannschaft s Nummer 1 im Verein
und für dia andara Mannschafta interessiert sich momentan kein Schwein.
Eine Hose minus
Da Markus Dietsche, genannt Zelt Mäk
kauft im Internet neui Hosa und hät jetzt da Dräck
Bim Amazon bstellt, glieferat und dahom schnell probiert
doch viel z kli wegam dicka Ranza, drum sofort wieder retourniert.
Er schickt dia z kli Hosa zrugg und jetzt mönd ihr guat losa
zämma mit sinara liebschta Lieblingshosa.
Er legt no an Zettel ini in Rücksendekarton
«D Hosagrössi bitte wia die biiglegti Hosa, lieba Herr Amazon».
Noch drü Wucha warta, lütat da Mäk is Internet-Gschäft a
und frögat, öb er sini Lieblingshosa wieder zrugg könnti ha.
Doch as isch sunnaklar, im Online-Shop wörd nünt me gfunda
und sini liebschti Lieblingshosa isch drum för immer verschwunda.
Und bi dära Gschicht’ schenk i mir grad no as Bierli ii
und dänk an alta Song «As isch amol an Tubel gsi».
Und tschüss
Mir Obervögel sind fertig mit üsara Körnlibank
förs Zuhöra und Lacha segid mer eu no „Besta Dank“.
Und fühlid eu hüt abend wia d Klima-Aktivista und machid s best’
Suffid bis i alli Nacht ini und kläbid eu am Stammtisch fest.
Räbschter Obervögel 2023
