Körnlibank 2025
Alles wird wieder modern
„Da isch out“ – vo wäge,
hüt chasch alles nomol träge.
Öb e Jacke mit Schulterpolster und Röhrlihose,
Polo Shirt, Tennissocke und Latzhose,
sogar Plateau-Schueh und Stirnbänder sind wieder in
hüt lit ächt alles wieder drin.
E paar Nostalgiker wänd sogar so wiit retour,
2.0, die sind ächt nöd à jour.
Und wo ih durs Dorf gloffe bi, do bin i ächt verschrocke,
do laufed Manne ume mit Fukuhila und lange Locke.
Fascht jede trait Zöpf oder en Rossschwanz,
Sind däne ehri Spiegel nümme ganz?
Bis i tschägged ha: Da hät domit z tue,
De Busch isch jo pensioniert, sin Coiffeurlade somit zue.
Verpflegungsnotstand
Jo a da Füürwehrwanderig isches Tradition,
för jedes Kilometerli laufa gits o sin Lohn.
Da Oldtimer voll Bier söll di nötiga Flüssikeitsverlüscht abdecka,
aber es isch doch ofach zum verrecka.
Kum zum Führwehrdepot duss,
baut da Fifi Graf mit am Oldtimer und da wertvolla Fracht an Schuss.
Er fluecht und es isch em nümma recht,
aber wär ez denkt, si segid verdurschtet, dä kennt d’Füürwehrler schlecht!
Wo sind die Büros?
Im Rothus oba hönds umorganisiert
und jedes Büro in an andera Stock platziert.
D Mitarbeiter fluchid bim Zügla wägam fehlende Lift.
dä wär hilfreich gsi bim Schleppa vu all däna Bleistift.
Mir Obervögel hönd au gehört, dass bim Zügla vu da Schränk
viel alta Staub seg föra ko und sogär a Gschänk.
Hinter am Kasta hätt mer gfunde no a paar alti Füfliber
immer no verpackt im gelba Zahltagssäckli vum ex Stüür-Sieber.
Doch eis isch klar, s Chef-Büro isch immer no z oberst im Rothus
wäg da schöna Aussicht, da Alex kunnt halt scho druss.
Alexander Baumgartner im Wintertraining
Im Winter gseh i da Alexander durchs Dorf seckla; er früürt a sini Scheicha
und i denk: „Dä mues glob schnell hom go seicha?“
Doch er hät nu sini Trainerhose vergässe und jetzt mönd ihr guat losa
drum isch da Ex-Turnerpräsi quer durchs Dorf gsecklat, nu i da Unterhosa.
Enttäuschte Schulkinder
Da Michael Jenny, Abwart vum Schualhus Schacha
organisiert för d Weihnachtsfiir a paar feini Sacha.
Versprocha hät ma Punch und Guetsli för alli Kind
und da stressig Abwart postet das Züg no gschwind
Doch d Schüler sind bitter enttäuscht gsi
und d Fiir isch drum ganz schnell vorbi
will da Jenny tatsächlich d Guetsli hät vergessa
und i glob, er hät alli selber gfrässa
GV Abstecher
Me wür monna dia vo da Gmeind kennid alli Müürli vom Pfada
und trotzdem gits bim Armin Langenegger noch FC-GV a kli Schada.
z’Fuess a kli zfrüa abboge beim Rinova, auwee,
aber dia Brüstung döt, dia mues neu sii, dia hät er no nie gseh‘.
Grillparty bei Aernis
Wenn’d öppis feins wotsch ässe,
bisch bim Philipp Aerni a de richtige Adrässe.
Uf em Grill macht är Poulet, Rind oder Schwein,
äs schmeckt alles afach mega fein.
Wenn är fürs Füür muess Schittli nolegge,
denn git’s nöd vil z überlegge.
Nur bim Holzhacke macht är e schlächti Falle,
de Philipp loht s Schittli uf d Zechä falle.
Es tuet höllisch weh, är isch nöd z rette,
me hackt o nöd i Flip-Flops oder Adilette.
Männerchor auf Reisen
Da Männerchor Räbstä isch eh gmüetlichi Truppa und bekannt fürs Singä
Näbet em Singä, tüend sii au sus viil Ziit mitenand verbringä.
Letsch joor händs übers Wucheend en Uusflug gmacht,
Bi dä Planig händ’s no guet glacht.
Dä Höheweg vo Berneck bis uf Altstättä isch d Idee gsii, nur wer
hät dänkt, dass es amena Wanderwäg au Beizä giit,
ach wiä schnell vorgoot in gmüetlicher Rundi diä Ziit.
Verhockent sinds somit scho ab dä erstä Beiz,
jojo, schöni Gaststättä händ scho ihren Reiz
Am Obig händs dän in Altstättä müesä sii,
deta nämmend’s denn no gmeinsam dä Znacht ii
Diä Wanderig no fertig z’laufä, das isch g‘laufä.
Es isch nünt anders überig blibä, als in eh Taxi stiigä
Elektronisches Problem zweier Rentner
D Vroni und da Hans Reichmuth, Eselgass
hönd mit am neue Auto leider kei Spass
D Elektronik hönds wohl selber programmiert
doch as hätt leider nöd ganz funktioniert.
„Bitte Anschnallen auf dem Beifahrersitz“ sagt a Stimm‘
und da Hinweis „Benzin tanken“ macht au no Sinn.
Doch „Achtung Langsamfahren wegen Glatteis“
isch scho komisch, im Summer, wenns 30 Grad isch heiss.
Heikle Investitonen
Mir sanierid mit viel Stüür-Geld Friedhöf, sogär Zwo statt nur Eina
sanierid da Werkhof und s Vereinshus Progy, wieso weiss Keina.
Mir kaufid a da Winkelstross Häuser und Abbruchobjekt
dia Geldvernichtig isch üs Räbschter Bürger scho a kli suspekt.
Und üsara Turnverein muess z Balgach an Jugitag organisiera
dänn mit üsera Anlage im Schachen ka ma sich nur blamiere
Am Gmeind- und Schulrot fehlt momentan d Logik und a klari Strategie
drum sind mutiger und sufed amol vor da Sitzig a Schlückli fürstlicha Wii.
Kathrin Schmitter und Claudia Fischli sind aktiv
Dia beide Damen sind neui Vorstandsmitglieder im Naturschutzverein
und suchid immer Mitglieder, egal ob Gross oder Klein.
As liegid ihna am Herza d Natur, d Bioversität und alli Tier
Und sie schaffid mit Arbeitskraft und nöd nu uf am Papier.
Dia ersti Handlig isch gsi bi ma na feina Kafi-Lutz
stellids grad sofort alli Obervögel unter Artenschutz.
Terminkollision
Us da Zitig hät mer müesä läsä dass Räbstä und Marpa sich troffä händ,
do häts aber schnell gee wiedermol Iiwänd.
Beidi Dörfer händ Planet enä sini nöd alljöhrlichä Fäster, bim einä
wird Saft trunkä und bim andere Bier
was söll jetzt do dra störä oder gots rein um Habgier
Es hät sich denn usägstell wiä im Zitigsbricht gläsä, das isch nöd glogä
D Räbster sind flexibel und sie hönd s Bierfäscht um eh Wuchä verschobä.
Frisuren wie Odermatt, Von Allmen und Co.
An Ma hätt mit üsna Skifahrer a da Weltmeisterschaft mit g’litta
vorallem wo sie sich hönd nach am Triumpf grad a Halbglatza g’schnitta.
Und i dänk, da wär grad a Gelegenheit zum Probiera
am Dani Morscher sin langa Hoorzopf abzrasiera.
Üsa Pensionär, da Busch wär för dä Hoorschnitt sicher prädestiniert
natürli nöd gratis, dia Arbeit wörd vu üs Obervögel querfinanziert.
Voller Einsatz
De Jorge Esteban isch mit de Ribelchuchi voll im Elemänt,
und lueged, dass jo nünt i de Pfanne abbrrännt,
denn die Reformierte ladid i zum Hälferässe,
doch noch kurzem müend d Köch sini Mithilf vergässe.
De Pager goht ab und de Jorge muess ränne,
irgendwo im Dorf tuet’s bränne.
Mit em Führwehrauto, dadüü, dadoo, dadüü, dadoo,
Si fahred los, de Isatz isch wo?
Wo sini Kollege dra gsi sind am flambiere,
hett i är bloss möse e chli mitstudiere.
I volle Montur stoht er wieder im Kirchgmeindhus
und ko Sau chunnt me drus.
Personalwechsel im Rathaus
Im Rothus schaffid vieli neui Lüt
und sinds gester no do gsi, so fehlids hüt.
Mitarbeiter um Mitarbeiter tönds iistella
und das dänn grad da Zitig verzella.
Doch ein paar Tag spöter kommuniziert ma scho wieder da nöchsti Ustritt
und dass es för d Stellvertretig an neua Stellvertreter git.
„Wer isch eigentlich dia Dienstältischt im Rothus?“, dänk i im Traum
„As isch glob dia füf-jöhrig Kafimaschina im Pausenraum.“
Mobilitäts-Dilemma
Wenn i wieder mol fort gang, wa macht denn jetzt Sinn
as ka jo o mol passiera, dass i a Gläsli z‘vill nimm.
Und wenn i do ghör wis d’Lüt übers Züg us schlot bim Laufa
und all di Lüchinger, Haltinner und Grof sich noch em Velofahra
Schönheits OP’s und neui Zäh mönd kaufa.
Denn denk i besser isch doch da Bus vo da RTB,
woni döt hani da Urs Graber di letschti fahra gsee.
Denn nimm i glob doch besser s‘Taxi da isch doch sicher schlau,
au nei döt fahrt ez Claudia vom Ochsa und di kenn i nu freundlich und zuvorkommend!
Handy-Suche eines Fussballers
Bim Emre Kocabas, üsam Räbschter Eis-Tschutter
isch bim Papiersammla nümme alles in Butter.
Will er mitten i da Arbeit hät gschwora
dass er sis Handy im Papiercontainer inna hät verlora,
hätt ma alli Papierbüntel wieder usgeräumt mit pura Muskelkraft
10 Mann, 1 Zusatzstunde, aber sie hönds gschafft.
Da Emre isch über s Finda vu sim Handy drum happy und froh
aber sini Tschutter-Kollega sind körperlich K.O.
Und vu dära wahra Gschicht d Moral
„Isch Handy-Verlüra imana Papiercontainer bi da Tschutter würklich normal?
Pünktlichkeit
Pünktlichkeit isch e Tugend,
bi de Alte und bi de Jugend.
Lieber z früeh wie z spot,
so lutet en guet gmeinte Rot.
Aber me cha’s o übertriibe
da sötted sich einigi hinter d Ohre schribe.
D Christine Graf, Sunnebräu, goht zum Helferässe,
und hät sich um ein Tag vermässe.
De Erwald Ender git sich Müehe,
erschint zunere Beerdigung e Wuche z früeh.
De Werner Ritter macht sich für d Metzgete uf de Wäg,
en Monet z früeh, isch da nöd schräg?
Ko Wunder dass Pensionierti nie Zit hönd,
wenn’s immer viel z früeh usem Hus usagönd.
Moderne Technik
De Martin Graf überwacht en Isatz mit sinere Drohne,
öb sich die modern Technik für d Füürwehr tuet lohne?
Dass au no en Krane vom Müggler in Isatz chunnt,
dodrüber bin i bi gär nöd erstunt.
Denn de Martin sött e chli besser studiere,
wenn är mit de Fernbedienig tuet uma hantiere.
D Drohne blibt hoch obe imene Baum hange,
um sie z befreie, tuet nämli d Leitere nöd lange.
FC Rebsteins Gedenknussbaum
A Niederlage tuat da Ehrenpräsi Hasa Steiner so sehr verletza
dass er grad symbolisch tuat an Nussbom setza.
Letscht Johr hät mer denn bim Spielplatz dia Bäume a kli mösa stutza
und hät denkt, mer könnt an kompetent Mann för da nutza.
Doch da Förster Benz, nei isch dä denn dumm,
dä haut doch grad da Nussbom unna um.
Au da hinterlot bim Hasa wieder tüüfi Spuura
und bösi Zunga bhoptid, er het nu drum wäg sim Herzli mösa go kuura.
Lauschiges Plätzchen für die Obervögel
D Bürgerversammlig hät da Sanierig vum Vereinshaus Progy zugstimmt
obwohl da Gemeindrot das tüür Bauprojekt leider ohni Anbau
hät bestimmt.
Glichzitig isch bewilligt wora d Umgestaltig vum legendära
Progy-Kiesplatz
as git neu a Begegnigszona zum Schiessa för d‘Hünd und mini Katz‘.
Neui Bäum wännds au no setza, dia tönd üs Obervögel sicher alocka
endlich hät jeda vu üs an eigna Baum zum Ufi-Hocka.
Kafi-Räbstock war genial
Isch da schö gsi im Advent, d Liechter im Räbstock hönd wieder brennt.
S isch gsi wia frühner, ma hät gfestat, gässa und gsoffa
und keina isch hungrig oder nüchtern über dia gföhrlich Stäga abi gloffa.
Mör Obervögel sprechid drum glob allna Räbschter us da Seel‘
„Danke allna Helfer unter da Leitig vu da Claudia Peter und da
Aurelia Schmitter-Keel“.
Aber eis mon i doch no säga und da isch kein Scherz
„Liebi Ortsgmeinde machid doch bim neua Rebstock-Projekt endlich vorwärts,
denn da wär geschieder als zwo tüüri Friedhöf z betrieba
i glob, da würid sogär dia Verstorbna no unterschrieba.“
Berufswechsel eines Beamten
I ha letzthin da ex-Gemeindsschrieber Urs Graber gseh‘
unterwegs als Chauffeur immana Bus vu da RTB.
Dä Jobwechsel isch sicher wia Ferie für dä gstressti Ma
wir hoffid, dass er sich wieder a bitzli erhola ka.
Bus-Verspötiga sind ab sofort normal, tua i spekuliera
will er jeda Tag da Martin Kehl muas in Tiergarta usi chauffiera.
Wartezimmer-Geschichten
För mis Liede bruch i neui Medizin
Drum gang i id Praxis vum Dokter Knierim
I warta und warta, mis Füdli schmerzt scho vum Hocka
Langsam wör i ungeduldig und s haut mi fascht us da Socka!!!
Anderi Patienta segid, ei Stund warte isch do nix
und i frög mi, gilt da stürlich scho als Zweitwohnsitz.
Räbstä läbt
Wenn mer dur’s Dorf lauft und eh kli flaniert,
isch mer doch gad au eh kli schockiert.
Autohändler schmückend diä schönä Kiesplätz,
verlasseni Restaurant und en Siech voll Bau-Ruinä hät’s.
In dä schönsta Wohnquartier baut mer jo nuno Wolkäkratzer,
öb mer det innä besser schloft noch em Guetnacht-Schmatzer?
Mer hoffend bi dä Raumplanig isch scho öpper, wo kunnt drus
oder stüred dä sit noischtem bi dä RTB en Bus.
Verbindigstechnisch sind mer mit da ÖV guet ufgstellt,
das hät mer letschti öpper verzellt
Das stimmt, zu da nögstä Bushaltistell isch es nöd wiit,
isch das villicht eso will Räbstä zwüschet Balgach und Marpa liit
so, mit Trüebsalblasen isch jetzt Schluss,
will mer machend mengmol au s‘beste drus.
Es giit dänn au no an neua Geserhuus-Bau,
endlich das isch doch Wau.
Im Alter wohnä ih amera schönä Altersresidenz,
das steigert ahgeblich wider Potenz.
Mer tüend luegä was ih de nögstä Joorä zräbstä passiert,
mer haltened eu uf em laufendä das isch sicher und garantiert.
Unterrichtsfreie Zeit
Vill hends Gfühl üsi Lehrer hegid viel Feri aber da isch gar
nöd wohr, hemmer mösa erkenna.
Unterrichts freii Zit tut mer da hüt benenna.
Da isch so viel Arbet nebet bi, wo mer alli eifach nöd wänd gsee,
drum mönds am Mäntig noch 2 Wucha Früeligsferie sogar no
an zusätzlicha Witerbildigs-Tag neh’.
Kum zum glauba und nu för Gstudierti zum verstoo
aber es git o gueti Lehrer, aso Lehrerinna da wüssid mer o.
Dass s Burggut, da Johr bim Umzug mitmached, findit mer absolut da Hit
und mör sind gspannt, wenns kompensierid dia säb Zit?
Wir sind Sieger
I lese vor Weihnachta i da Zitig no s Best‘
mör Räbschter stönd z oberst uf am Podest.
Mör hönd da schönst Christbaum im ganza Tal
an grosse Dank üsem Bauamt, ihr sind phänomenal.
Da Sämi Rohner isch übrigens da Sponsor vo däm schöna Bom
Zuefällig ha i amol i Stuba glueget bi ihm dahom.
I gseh ihn stolz vor am Fernseh hocka
mit da Goldmedailla um da Hals tuat er frohlocka.
Familie Pinsel in Nöten
D Anni Graf, d Mutter vom Pinsel Markus
Fahrt mit em Auto us da Garage mit Schuss
Sie frogt sich: Wo isch dänn plötzlich min Rückspiegel hi?
I da Garage isch er doch no dra gsi.
Dä Blechschade goht schnell vergässe
da Markus tuet sini Muetter meh stresse
Sie muess da Markus zum Doktor bringa und hätt ihn scho
im Auto verstaut
will dä Tubel sich bim Baumfälla selber in Arm ini haut.
Kluge Lehrer schützen sich
Da Bommlis Werner isch förs Training a kli spooot dra
und kunt bi da Tschutter mit era uh huerra Büla a.
Er hät versucht bi da Bahnschranke una dori no gschwind
doch dia hauts em leider voll an Grind.
Da ehemols schnellscht Marper hät sich im Alter halt e kli überschätzt
und sich ghörig am Schädel verletzt.
Jo, au als vorbildlicha Pädagog hät er da Helm leider nöd föri gnoo,
drum isch er mit era Büla und ama blauem Auge no guat davo koo.
Rebstein kann’s auch
Altstätta hät mit am Markus Ritter an Bundesratskandidat
aber au mör Räbschter hönd Eina parat.
Nämlich üsa Patrick Rohner, da best wos git
dä vu da Gruppierig Räbschter 2.0 hätt jetzt sicher da Ziit.
S Militärdepartement wörd för ihn sicher kein Flop
dänn bim 1. August-Rakete abschüsse isch er top.
Englischer Rasen
Ih dä Summerferiä findet s’Pokalturnier uf da Birkenau statt
Tschuttet und gfäschtet wird und öppä eine setzt sich selber schachmatt
Uf em Tschuttplat z’Räbstä isch, wie mehr wüssend, de Rase jo heilig
Zuäständig für diä Göttlichi pfläg isch dä Marco„Korber“Lüchinger alleinig
S’ grossi Wüssä und s Know-Hau,
hät er sich zuegleit uf em Bauamt und im Gartebau.
D’Rächnig hät er aber ohni Sunnäbräu gmacht und er isch fascht plazt
will dä Chauffeur hät Bierliferig broocht direkt quer über dä Fuessballplatz.
D Spuurä diä sind tüüf gsii im Rase,
das hät eh kli broocht alli in Rage
Üs Zuschauer isch das doch gliich gsii,
mer händ gnüsslich trunkä üsers guete Rhintaler-Bierlii.
Streit um Nichts
As stoht i da Zitig uf da Titelsiita
dass sich a Ur-Räbschterin mit da Gmeind’ teg stritta.
D Lydia Graf mös nämlich da Kehrichtsack umplatziera
und da tuat ihri Nerva ghörig strapaziera.
Fakt isch, sie ka da Abfall nümma grad vor s Hus usi stella,
sondern mues neu ganzi 20 Meter laufa, tuat sie üs verzella.
Jo liebi Lydia, züch zum Kübelsack-Schleppa halt dis Sportdressli a
statt wia bisher s Pyjama.
Donald Trump ist Räbschter-Fan
Öpa vor füüf Johr isch da Donald Trump bekanntlich bi üs z Räbschta gsi
Gester hätt er üs Vögel gschrieba, är kämm dänn wieder amol vorbi
obwohl er als neue Präsident viel z tua hegi im Wissa Hus
und wäga däne Räbschter Fake-News käm er gär nümma drus.
Sin Ussaminister heg ihn drum informiert
dass d Fusion mit Marpa leider nöd heg funktioniert
Er geb üs n Tipp gratis und franko:
„Bauid a hochi Mur a d Marper-Grenza, so wia i z Mexico“.
Da Trump dankt au no am Samiklaus-Chef Sven Ender
är heg ghört, Vater und Sohn segid a guats Paar und kei Blender
und för da alti Samiklaus Haarfresser Peter Sieber
spendi är i d Pensionskasse grad no zwei Füüfliber.
Er heg au ghört, dass d Räbschter Fasnacht neu an Verein isch wora
da findet er guat, dänn könnid no mehr Lüt drischnorre
da seg eigentlich wia d Politik bi ihm z Amerika
döt heg d Kamela Harris au nu gseit „blabla“.
Da Strohballa-Unfall vum Peter Zemp findet er au suspekt
und da Tschutter wünscht er an gueta Abschluss vom Birkenau-Projekt.
Und üsam neua Gmeinds-Guru Alex Arnold söllid mer au no an Gruess usrichta
wenn er Problem hegi mit am Chiccoree-Puur, käm er sofort go schlichta.
Er käm s nöchste Mal gern wieder zu üs go Essa und Suffa
doch i da viela Kebab-Läda käm er fascht nümma zum Schnufa.
Er wünscht au da Ortsgmeind viel Glück bi da Realisierig vu da neua Beiz
fuck you Heimatschutz, da Rebstock hegi halt da immer no an Reiz.
Da Donald wünscht eu Fasnachtspublikum weiterhin a guats Fäscht
er mös jetzt ufhöra, will er mit sinara Melania hüt no sött is Näscht.
Räbschter Obervögel 2025
